Rreth 400 pjesëtarë të strukturës paramilitare të veriut të Kosovës, famëkeqja “Civilna Zashtita” po trajnohen nga ana e OSBE-së dhe qeverisë së Prishtinës që të punojnë në ushtri, polici dhe administratën e Kosovës.
Siç bëhet e ditur në një njoftim të OSBE-së, 378 ish-pjesëtarë të ‘Mbrojtjes Civile’ nga veriu i Kosovës janë trajnuar sot me temë kornizën institucionale dhe ligjore në Kosovë, përshirë të drejtat e komuniteteve.
Kursi gjashtë-javor organizohet me kërkesë të Ministrisë se Kosovës për Dialog, dhe po mbahet në Akademinë për Siguri Publike në Vushtrri.
“Misioni i OSBE-së po e ofron këtë kurs trajnimi si pjesë e përpjekjeve të saj për të mbështetur zbatimin e marrëveshjeve të Brukselit të arritura mes Prishtinës e Beogradit me lehtësimin e Bashkimit Evropian”, tha Shefi i Misionit të OSBE-së në Kosovë, Ambasadori Jean-Claude Schlumberger.
“Jemi të kënaqur që kemi mundur të kontribuojnë në këtë proces dhe besojmë se rezultati përfundimtar do të jetë ofrimi i shërbimeve më të mira për të gjitha komunitetet në Kosovë. Në emër të partnerëve, dua të falënderoj Akademinë për Siguri Publike dhe stafin e vet për mbështetjen e gjithmbarshme dhe për ofrimin e objektit për mbajtjen e trajnimit”, u shpreh ai.
Përveç Ambasadorit Schlumberger, ngjarjes iu drejtuan me një fjalë rasti edhe Ministrja për Dialog Edita Tahiri, Sekretari i Përgjithshëm në Ministrinë e Administrimit të Pushtetit Lokal Besnik Osmani, Drejtori i Përgjithshëm i Akademisë për Siguri Publike Ismail Smakiqi dhe përfaqësuesja e EULEX-it Eva Gutjahr.
Të 378 pjesëmarrësit kanë nënshkruar kontrata së fundmi dhe do të punojnë në ministri e agjenci të ndryshme në Kosovë. Ky kurs do të pasohet nga një modul më specifik me fokus shërbimin civil, që do të mbahet nga Instituti i Kosovës për Administratë Publike.
Mbrojtja Civile është një organizim i serbëve të veriut, ka qenë që në vitin 1999 një strukturë paralele e financiar nga Serbia.
Madje edhe sot që ata marrin rrogën nga buxheti i Kosovës, ende paguhen nga Beogradi me një pagë mesatare 500 euro në muaj.
Pjesë e “Mbrojtjes Civile” janë edhe pjesëtarë që janë të inkriminuar, të ashtuquajtur “Roje të urave”, por edhe pjesëtarë të strukturave të sigurisë të shtetit serb.
“Rojat e Urës” kanë qenë një grupacion i paligjshëm sigurie, i themeluar në përfundim të luftës në Kosovë, në përbërje të të cilit thuhej se kishte edhe pjesëtarë të pensionuar të forcave paramilitare serbe. Prania e këtij grupi në urë ka pamundësuar qarkullimin e lirë ndërmjet pjesës jugore të Mitrovicës, të banuar me shumicë shqiptare dhe asaj veriore të banuar me shumicë serbe.
Këtu janë fshehur strukturat ilegale edhe të shërbimit secret serb, por edhe të tjerë.
/tesheshi.com/
