Kryeministri hungarez Viktor Orban foli për një “gabim historik” të BE-së kur u pyet për të komentuar vendimin e Brukselit për shkëputjen e procesit të anëtarësimit të Shqipërisë në BE nga ai i Maqedonisë së Veriut.
“Kjo nuk është e drejtë nga ana jonë (BE-së). Për të qenë të drejtë, Maqedonia e Veriut duhet të ishte anëtare e BE-së shumë kohë më parë. Vendimet e Unionit janë traumatike dhe krijojnë plagë. Prandaj është një gabim i madh që nuk jeni ende anëtar i BE-së dhe një gabim akoma më i madh që ju shkëputin nga një vend tjetër (Shqipëria), e cili është shumë i favorizuar”, shtoi Kryeministri i Hungarisë, pas takimit që pati në Ohër me homologun Christian Mickoski. Sipas Viktor Orbanit, vendet e Ballkanit Perëndimor meritojnë shumë më tepër se sa marrin nga Brukseli.
Ambasadorët e vendeve anëtare të BE-së vendosën të mërkurën të shkëputin kursin europian të Shqipërisë nga ai i Maqedonisë së Veriut.
Procesi i anëtarësimit të Shqipërisë dhe Maqedonisë së Veriut ka qenë i lidhur deri tani. Megjithatë, “vetoja” e Bullgarisë për Maqedoninë e Veriut ka vonuar përparimin për të dyja vendet, me Shqipërinë në këtë rast që është viktimë e një “humbjeje kolaterale”.
Marrëdhëniet e trazuara të Maqedonisë së Veriut me Bullgarinë janë përkeqësuar veçanërisht që kur VMRO-DPMNE e krahut të djathtë mori pushtetin në Shkup qershorin e kaluar. Të dy vendet kanë dallime historike, etnike dhe gjuhësore që përfshijnë dekada.
Rruga evropiane e Maqedonisë së Veriut mbetet e stopuar, kryesisht për shkak se Shkupi nuk i ka përmbushur detyrimet që ka marrë – bazuar në një propozim të paraqitur nga BE-ja dy vjet më parë. Propozimi parashikon ndryshimin e Kushtetutës së Maqedonisë së Veriut për të përfshirë edhe pakicën bullgare që jeton në vend, gjë që qeveria e re e kundërshton fuqishëm.
Viktor Orbán ofroi, ashtu si Hungaria, e cila mban presidencën e BE-së për gjashtë muajt aktualë, të ndërmjetësojë mes Maqedonisë së Veriut dhe Bullgarisë për të kapërcyer konfliktin mes tyre. /tesheshi.com/
