Nga Mensur Krasniqi
Me afrimin e fundivitit, po nxehen dhe debatet në Kuvendin e Maqedonisë lidhur me propozim-buxhetin për vitin 2016. Nga ajo që është diskutuar deri tani mes deputetëve të partive në pushtet dhe opozitës, është vënë në dukje se opozita assesi nuk do t’ a mbështesë propozim buxhetin që kanë hartuar partitë në pushtet.
Sipas LSDM-së, buxheti për vitin 2016 është joreal dhe jozhvillimor, pasi këto para dhe mjete qeveria nuk i shpenzon për zhvillim, por për shpenzime joproduktive. Çfarë dobie ekonomike ka sjellë projekti “Shkupi 2014”, pyeti Marjanço Nikollov.
“Tani s’ka më përmendore, filluat të mbillni palma. Pastaj çfarë do të mbillni, banane apo arra kokosi?! Çfarë e keni ndërmend të bëni nga Maqedonia?! Edhe me këtë buxhet, qeveria ka hartuar çokollatë të madhe. Por, çokollatën do ta hanë funksionarët qeveritarë, për qytetarët do të mbetet letër, prandaj ky buxhet nuk do të ketë mbështetjen e opozitës”- tha Marjanço Nikollovski nga LSDM.
Njëjtë edhe deputetët nga rradhët e opozitës shqiptare, gjegjësisht PDSH-së kanë deklaruar votën kundër, pasi vlerësojnë se edhe ky buxhet, si buxhetet e mëparshëm, është diskriminues dhe antishqiptar.
“Ky projeksion buxhetor për vitin 2016 është i njëanshëm dhe diskriminues mbi baza etnike në drejtim të ndarjes joracionale dhe joproporcionale të fondeve buxhetore. Si i tillë ky projeksion buxhetor me mekanizma institucional favorizon thellimin e hendekut të mirëqenies ekonomike të qytetarëve të RM-së mbi baza etnike”– deklaroi Gazmend Aliu nga PDSH.
Ndryshe nga opozita, partnerët e koalicionit qeveritar kanë hedhur poshtë pretendimet e opozitës. Sipas ministrit të Financave, Zoran Stavrevski, buxheti nuk duhet ndarë në baza etnike, pasi me para buxhetore ndërtohet infrastrukturë dhe objekte publike që shfrytëzohen nga të gjithë qytetarët e Maqedonisë.
Në vazhdim Stavrevski hodhi poshtë edhe akuzat e opozitës se qeveria po ndërton suksesin e saj ekonomik me huamarrje, duke e zhytur vendin në borxhe të mëdha. 
“Të gjitha vendet në kohë të krizës financiare botërore kanë marrë hua me qëllim që të luftojnë atë krizë dhe të ndërtojnë rrugë, hekurudha ose të financojnë deficitin buxhetor. Në Maqedoni fatmirësisht deficit buxhetor ishte 5/6 herë më i ulët se në vende të tjera dhe në bazë të saj mundëm të ngarkohemi me borxh më pak”- theksoi ministri i Financave, Zoran Stavrevski.
Ndërkaq, sipas deputetëve të BDI-së, projektbuxheti reflekton marrëveshjen politike mes partnerëve të koalicionit dhe si i tillë është i pranueshëm.
“Propozim-buxheti për vitin 2016, i cili është rezultat i marrëveshjeve politike mes partnerëve të koalicionit dhe si rezultat i asaj marrëveshje janë të pasqyruara të gjitha ato projekte që janë të partnerëve të koalicionit”- u shpreh Rexhail Ismaili nga BDI.
Debati parlamentar për buxhetin do të zgjasë edhe 9 ditë. Arka e shtetit për vitin 2016 do të rëndojë rreth 3.2 miliardë euro. Projektimi bazohet në rritjen e ekonomisë, që pritet të jetë 4 për qind nga BPV, ndërsa inflacioni 2 për qind.
Sipas propozim buxhetit për vitin 2016, shpenzimet e përgjithshme janë projektuar në 195.788 milionë denarë, të cilat janë për 4,7 për qind më të larta se ato në vitin 2015, ndërsa të ardhurat e përgjithshme janë projektuar në 176.804 milionë denarë, ku ka rritje për 6 për qind krahasuar me vitin 2015. Ndërsa për propozim-buxhetin janë dorëzuar gjithsej 418 amendamente. /tesheshi.com/
