Siç njofton rrjeti mediatik Al Jazeera, një gjykatë apeli në SHBA u ka dhënë amerikanëve muslimanë një tjetër mundësi për ta paditur Departamentin e Policisë së Nju Jorkut për mbikëqyrjen mbi ta.
Një gjykatë e nivelit më të ulët e kishte pushuar vitin e shkuar çështjen në të cilën policia qe akuzuar për vënien në shënjestër në mënyrë të qëllimshme të muslimanëve për shkak të fesë së tyre, shpjegon më tej Al Jazeera.
Por Gjykata e Tretë Shëtitëse e Apeleve në Filadelfia e ktheu vendimin e gjykatës së nivelit më të ulët, duke parë se pala paditëse kishte pozitën juridike për t’i mbrojtur pretendimet se i ashtuquajturi program kundër terrorizmit i vendit i shkelte të drejtat e tyre.
Gjykatësi William Martini i distriktit të Nju Xhersit e pushoi në 2014-ën çështjen Hassan-i kundër Qytetit të Nju Jorkut, të nisur nga një grup muslimanësh që e akuzonin Departamentin e Policisë së Nju Jorkut për spiunimin e tyre pa shkak.
Paditësi kryesor në çështje ishte Syed Farhaj Hassan. Ai deklaronte në padi se nuk shkonte më në xhami pasi e dinte se prej mbikëqyrjes së Departamentit të Policisë së Nju Jorkut mund të vihej gabimisht gishti në të si një terrorist, e kësisoj ai druhej se mund të humbte më së paku vendin e punës. /tesheshi.com/
