Nga Blendi Gashi
Akgjytkimi i Gjykatës Kushtetuese se marrëveshja për Asociacionin nuk është në përputhje të plotë me Kushtetutën, siç duket vetëm sa pritet të thellojë dhe më tej krizën politike në Kosovë e jo të zgjidhë atë.
Kështu të paktën janë sinjalet e para që vijnë nga dy taboret, pushteti dhe opozita kosovare, të cilat vazhdojnë të gjuajnë me fjalë njëra-tjetrën, duke mbyllur derën për një zgjidhje të mundshme mes tyre.
Qeveria, vendimin e Kushtetueses e sheh si udhërrëfyes për hartimin e statutit të Asociacionit, ndërsa opozita thotë se pushteti aktual nuk ka kredibilitet për të marrë vendime të tjera pas aktgjykimit të Kushtetueses.
Kryeministri Isa Mustafa në mbledhjen e fundit të qeverisë ka bërë të ditur se ekzekutivi do ta dërgojë në Gjykatën Kushtetuese dekretin dhe statusin e Asociacionit, duke thënë se nuk ka hapësirë të thuhet se Asociacioni nuk do të bëhet.
Kreu i ekzekutivit kosovar i ka bërë thirrje spektrit politik të bëhet pjesë e ekipit gjithëpërfshirës për hartimin e statutit, duke thënë se më nuk ka arsye për bllokim të institucioneve e protesta në rrugë.
Por opozita kosovare paralajmëron pushtetin se kriza në vend veç sa do të thellohet edhe më shumë nëse nuk dorëhiqen por vazhdojnë me veprime të tjera që ndërlidhjen me çështjen e ‘Zajednicës’.
Nënkryetari i AAK-së, Ahmet Isufi, ka deklaruar për portalin tesheshi.com se ekzekutivi i vendit në asnjë mënyrë nuk duhet të vazhdojë me hapat tjerë për Asociacionin por duhet të mbajë përgjegjësi për shkeljen e Kushtetutës së vendit.
“Gjykata Kushtetuese ka konstatuar se qeveria ka shkelur Kushtetutën dhe asnjë document që prodhon qeveria aktuale nuk vlen, sepse me vet faktin që ka ndryshu esenca e marrëveshjes që ka dëmtu interesin e Kosovës tregon se kjo qeveri duhet të dorëhiqet dhe t’i lë angazhimet sepse nuk ka kredibilitet as moral e as politik dhe as legalitet të veproj.
Në të kaluarën kur Kushteutesja ka konstatuar se ka shkelje të Kushtetutës presidentët kanë dhënë dorëheqje dhe kjo tregon se edhe qeveria aktuale duhet të jep dorëheqje dhe poashtu të thirret në përgjegjësi”, ka deklaruar Isufi.
Lideri i partisë NISMA për Kosovën, Fatmir Limaj, përmes një shkrimi në Facebook i ka bërë thirrje koalicionit qeveritar PDK-LDK që ta respektojë vendimin e Kushtetueses, përndryshe ka paralajmëruar thellim të krizës politike në vend.
“Gjykata ka konstatuar se qeveria ka shkelur Kushtetutën duke nënshkruar marrëveshjen e parimeve për bashkësin serbe. Çfardo hezitimi, apo çfardo tendence për ti ikur përgjegjësisë, pas këtij realiteti të ri juridiko-politik që solli vendimi i gjykatës kushtetuese do ta thelloj edhe më shumë krizën politike”, ka deklaruar Limaj.
Analisti politik Faik Krasniqi, ka deklaruar për tesheshi.com se Asociacioni është kancer i brendshëm i Kosovës, dhe nuk guxon kurrsesi të pranohet, andaj thotë se nuk ka arsye pse dekreti dhe statuti të dërgohen në Gjykatën Kushtetuese.
“Ky Asociacion duhet të rinegociohet në Bruksel, në mënyrë që të mos jetë asgjë përpos një Organizatë Joqeveritare. Por pikë së pari, Isa Mustafa me Qeverinë e tij nëse kanë vetëm pak moral duhet që sa më parë të japin dorëheqje. Por meqë këta pushtetarë të pamoralshëm, të papërgjegjshëm, mafiozë dhe kriminelë nuk vetëdorëhiqen, opozita e bashkuar, shoqëria civile, mediat dhe populli, duhet të ngriten në këmbë për t’i përmbysur nga pushteti, për dëmet që tentuan të na shkaktojnë. Madje, Prokuroria e Shtetit duhet të ngrit edhe kallëzim penal ndaj këtij pushteti dhe ndaj dyshes Mustafa-Thaçi, për tradhëti të lartë kombëtare”, thotë Krasniqi. /tesheshi.com/
