Opozita ka braktisur sallën e parlamentit si reagim ndaj cilësimit “zogj korbi” nga ana e kryeministrit Rama, të deputetëve të saj. Debate po zhvillohej mbi heqjen e ndihmës ekonomike për qindra familje, për të cilat opozita akuzon qeverinë duke e quajtur si “akt kriminal”. Por Rama, në stilin e tij, është mbrojtur duke thënë:
“Tritan, ne nuk krahasohemi me kohën e Zogut, po përballë zogjve të kohës që jeni ju dhe që fluturoni si korbat mbi çdo gropë që hapët duke kërkuar llogari prej nesh. Urdhëro, vazhdoni fluturoni, po ta mësojnë njerëzit se ju jepnit 38 mln dollarë për ndihmën ekonomike, ne japim 48 mln dollarë”, deklaronte Rama, ndërsa masa e deputetëve nisi të lërë vendet e të dalë nga salla, pasi më parë iu drejtua folëses ku ishte Rama. “Si s’ke turp”, u dëgjua Basha t’i drejtohej kryeministrit.
Më parë, kryedemokrati u shfaq i ashpër në fjalën e tij.
“Ndihma ekonomike është një detyrim i qeverisë. Këta kanë shpikur një sistem pikëzimi, por refuzojnë ta bëjnë publik. Nuk ka krim më të madh se sa me vetëdije t’u heqësh bukën e gojës këtyre familjeve. Vini të krekosur nga milionat e vjedhurave përmes pushtetit tuaj. Këtu nuk llogaris edhe 5 mijë të tjerë me aftësi të kufizuar, të cilët e meritojnë ndihmën ekonomike pasi nuk kanë asnjë të ardhur”, u shpreh kreu demokrat. /tesheshi.com/
