Opozita bllokoi sërish seancën e Kuvendit, ndërsa kreu i partisë Demokratike, Lulzim Basha bëri thirrje për bashkim në protestën e së shtunës para Kryeministrisë. Pas ndërprerjes së seancës nga ana e Gramoz Ruçit, Basha përdori një transmetim live në Facebook për të përcjellë thirrjen e opozitës për protestë.
“Të bashkohemi ta çlirojmë Shqipërinë nga qeveria e krimit, qeveria anti-europiane e ta bëjmë Shqipërinë si gjithë Europa”, tha Basha.
Sipas tij, arsyet për protestë janë të shumta. “Sot shteti ka rënë. Shkelet në mes të ditës ligji antimafia për të mbrojtur familjen mafioze Xhafaj. Prokuroria duhej të bllokonte pasaportën e Agron Xhafajt”, tha Basha.
Sipas kreut të opozitës, Fatmir Xhafaj është subjekt i ligjit antimafia sepsë vëllai i tij është i dënuar si një pjesëtar i një organizate ndërkombëtare të trafikut të drogës. “Fatmir Xhafaj është subjekt i ligjit antimafia ashtu sa dhe vëllai i tij. Sa kohë që është shefi politik i Arta Markut dhe Donika Prelës ligji nuk ka fuqi mbi të, siç nuk ka fuqi për 4 vjet mbi Saimir Tahirin. Ligji ka fuqi vetëm për Dritan Zaganin dhe për të mbajtur kuksianët në burg”, theksoi ai.
Pas fjalimit opozita u largua dhe seanca vijoi me deputetët e maxhorances lidhur me raportin e Komisionit Europian. /tesheshi.com/
