Ambasada e Shteteve të Bashkuara dhe delegacioni i BE-së në Tiranë kanë përshëndetur opinionin e datës 10 dhjetor të Komisionit të Venecias mbi Ligjin e Vetingut.
SHBA ka shprehur besim se Gjykata Kushtetuese do të riparojë besimin e publikut tek sistemi gjyqësor që është dëmtuar nga gjykatës dhe prokurorë të korruptuar.
“Vetingu i gjykatësve do të jetë një hap kuptimplotë drejt eliminimit të korrupsionit të thellë gjyqësor në Shqipëri dhe opinioni i Komisionit të Venecias duhet t’i japë fund çdo shqetësimi legjitim lidhur me ligjin. Presim vendimin e Gjykatës Kushtetuese mbi Ligjin e Vetingut, që ka pasoja me ndikim të gjerë për Shqipërinë dhe të ardhmen e saj”, thuhet në njoftim zyrtar të ambasadës amerikane.
Më herët delegacioni i BE-së kërkoi zbatimin e Reformës në Drejtësi, pas marrjes së konfirmimit nga Venecia për katër pyetjet e Gjykatës Kushtetuese, lidhur me ligjshmërinë e Vettingut.
“Ne nxisim gjithë të gjitha forcat politike, të gjitha institucionet shtetërore përkatëse dhe të gjitha organet gjyqësore në Shqipëri që të nisin pa vonesa të mëtejshme zbatimin e reformës së drejtësisë”, thuhet në deklaratën e BE-së./tesheshi.com/
