Organizata e Vendeve Eksportuese të Naftës (OPEC) i ka thënë Bashkimit Evropian se sanksionet aktuale dhe të ardhshme kundër Rusisë mund të krijojnë një nga goditjet më të mëdha në tregun e naftës dhe se aleanca nuk mund të zëvendësojë sasitë ruse dhe të rrisë prodhimin e saj.
Në një kohë kur Brukseli po planifikon sanksione të reja ndaj sektorit energjetik të Rusisë, zyrtarët e Bashkimit Evropian në Vjenë u takuan me përfaqësuesit e OPEC-ut pas një thirrjeje perëndimore drejtuar grupit prej 13 vendeve për të rritur prodhimin. “Mund të ketë një humbje prej shtatë milionë fuçi nafte ruse dhe energji të tjera në ditë, për shkak të sanksioneve aktuale dhe të ardhshme dhe veprimeve të tjera”, tha Sekretari i Përgjithshëm i OPEC-ut, Mohammad Barkindo.
Duke pasur parasysh gjendjen aktuale të sektorit, vazhdoi ai, “do të ishte pothuajse e pamundur të zëvendësohej humbja e sasive të asaj përmase”.
Bashkimi Evropian u ka bërë sërish thirrje vendeve të OPEC-ut që të marrin në konsideratë rritjen e prodhimit për të zbutur rritjen e çmimeve, tha një zëdhënës i Komisionit Evropian për Reuters. Përfaqësuesit e BE theksuan para OPEC-ut se aleanca ka përgjegjësinë për të siguruar ekuilibrin në tregjet e energjisë, tha përfaqësuesi i KE-së.
Thirrjet e refuzuara nga SHBA
OPEC ka refuzuar deri më tani thirrjet nga Shtetet e Bashkuara dhe Agjencia Ndërkombëtare e Energjisë për të rritur prodhimin e saj për të zbutur rritjen e çmimeve, e cila ishte më e larta në 14 vjet muajin e kaluar.
BE beson se OPEC mund të rrisë prodhimin nga kapaciteti rezervë, sipas një dokumenti të të këtij organizmi të poseduar nga Reuters.
Barkindo tha se paqëndrueshmëria aktuale e tregut është për shkak të “faktorëve jothemelorë” përtej kontrollit të OPEC, duke sinjalizuar se shtetet nuk do të rrisin prodhimin e tyre.
Anëtarët aktualë të OPEC-ut janë: Algjeria, Angola, Guinea Ekuatoriale, Gaboni, Irani, Iraku, Kuvajti, Libia, Nigeria, Kongo, Arabia Saudite, Emiratet e Bashkuara Arabe dhe Venezuela.
OPEC +, një format i zgjeruar i aleancës së cilës i është bashkuar Rusia, do të rrisë prodhimin me 432,000 fuçi në maj si pjesë e një ndërprerjeje të planifikuar të shkurtimeve të prodhimit të prezantuara gjatë pandemisë. /tesheshi.com/
