Jemenasit, veç konfliktit të zgjatur, përballen tani dhe me urinë, një armik më shumë në luftën e tyre për mbijetesë.
Alarmuese, në kufijtë e dëshpërimit, është dhe thirrja e OKB-së për ndihmë, për të shmangur një katastrofë njerëzore në një vend të mbërthyer nga paqëndrueshmëria.
Organizata e Kombeve të Bashkuara ka paralajmëruar se jo pak, por 17 milionë jemenas, do t’i dorëzohen urisë nëse nga pjesët e tjera të botës nuk dërgohen ndihma të ngutshme humanitare.
Vetëm tani janë më shumë se dy milionë fëmijë jemenas që vuajnë nga kequshqyerja. Akoma më keq, në gjysmëmilioni prej tyre kequshqyerja është në nivele kritike, duke u rrezikuar jetën.
Sekretari i përgjithshëm i OKB-së, Antonio Guterres, bëri dje thirrje për veprim në një konferencë ndihme në Gjenevë.
Sipas tij, një fëmijë nën moshën pesë vjeç vdes çdo dhjetë minuta në Jemen për shkaqe të shmangshme.
“Kjo do të thotë se gjatë konferencës së sotme do të vdesin 50 fëmijë në Jemen, dhe të tëra këto vdekje mund të jenë parandaluar,” deklaroi Guterres.
Vendet dhuruese u zotuan dje për një ndihmë prej 1.1 miliardë dollarësh; një shifër që OKB-ja thotë se është gjysma e asaj që duhet për të luftuar “krizën më të madhe në botë të urisë”. /tesheshi.com/
