Ndërsa beteja për marrjen e Mosulit vijon, Organizata e Kombeve të Bashkuara shpreh shqetësimin për civilët e vrarë nga sulmet ajrore të koalicionit të udhëhequr nga SHBA-ja.
Një zyrtar i lartë i OKB-së në Irak solli në vëmendje zërat për 200 civilë të vrarë në një sulm ajror të koalicionit që mbështet ushtrinë irakiane për nxjerrjen e ISIS-it nga Mosuli.
Në një lagje të pjesës perëndimore të qytetit u nxorën 50 trupa një ditë më parë prej ndërtesave. Zyrtarë të ushtrisë amerikane janë cituar nga New York Times-i të kenë thënë se koalicioni po hetonte raportet mbi viktimat civile nga një sulm mes 17 dhe 23 marsit.
Megjithatë, një zëdhënës i komandës së udhëhequr nga SHBA-ja e bëri të qartë se ky proces kërkonte kohë.
Sipas OKB-së, 400.000 civilë irakianë janë të bllokuar në qytetin e vjetër të Mosulit, aty ku luftohet për marrjen e tij. Nga pjesa perëndimore e Mosulit u larguan muajin e shkuar 180.000 civilë, e mijëra të tjerë pritet që të bëjnë të njëjtën gjë në javët e ardhshme. /tesheshi.com/
