Një rezolutë e Kombeve të Bashkuara që kërkon ndalimin e ndërtimit të vendbanimeve të reja në territoret e pushtuara palestineze është shpërfillur nga Izraeli, që nuk ka reshtur së bëri të kundërtën.
E ka bërë të ditur këtë i dërguari i OKB-së për Lindjen e Mesme, Nickolay Mladenov, në të parin raport për Këshillin e Sigurimit që prej miratimit të rezolutës dhjetorin e 2016-s.
Në një kohë që rezoluta kërkonte që të ndërpritej menjëherë nga Izraeli aktiviteti i ngulimeve, asnjë hap i tillë nuk është ndërmarrë, është shprehur i dërguari i OKB-së në raport.
Vetëm në janar, Izraeli njoftoi për ndërtimin e më shumë se 6.000 shtëpive në Bregun Perëndimor dhe në Jerusalemin Lindor.
Ngulimet në këto dy territore cilësohen si ilegale sipas ligjit ndërkombëtar. Raporti i të dërguarit të OKB-së për Lindjen e Mesme i paraprin një sesioni me dyer të mbyllura të Këshillit të Sigurimit ku temë do të jetë konflikti izraelito-palestinez. /tesheshi.com/
