Një panel i OKB-së dënoi shkeljen e të drejtave njerëzore të pakicave në një analizë dyditore mbi diskriminimin racial në Francë. Shqetësimi u shpreh nga drejtuesi i Komitetit të OKB-së për Eliminimin e Diskriminimit Racial, Ion Diaconu, i cili deklaroi se, “Ne shohim se parimi i barazisë nuk është reflektuar plotësisht, mbi të gjitha, për shkak të intolerancës dhe racizmit.”
Rritja e racizmit dhe ksenofobisë në Francë ishte vënë në dukje më herët dhe në një raport në shkurt të këtij viti të Këshillit të Europës. Raporti i kërkonte Francës të luftonte rritjen alarmuese të intolerancës dhe racizmit ndaj të gjitha pakicave, pasi trajtonte çështjet e vandalizmit dhe të urrejtjes ndaj muslimanëve, hebrenjve, si dhe diskriminimin mbizotërues karshi emigrantëve, komunitetit rom, e përjashtimin shoqëror të invalidëve.
OKB-ja i tërhoqi vëmendjen Francës për lejimin e racizmit dhe dhunës, dhe dënoi një “banalizim” të gjuhës së urrejtjes në këtë vend. Ndërkaq, ekspertët vlerësuan një vendim të Francës për të investuar 100 milionë euro në një plan të hartuar kundër racizmit. Plani, që mes masave të tjera rrit dënimet për krimet e nxitura nga racizmi dhe antisemitizmi, vjen në një kohë kur aktet kundër muslimanëve dhe hebrenjve janë shtuar ndjeshëm në Francë.
Bashkësia muslimane në Francë është më e madhja në Europë, dhe numri i muslimanëve llogaritet të jetë nga 4 në 5 milionë. Kjo bashkësi përbën afër 6 për qind të numrit të përgjithshëm të popullsisë, prej 58.5 milionësh. Megjithatë, muslimanët nuk ndjehen të sigurt, ndërsa sulmet ndaj tyre janë rritur gjashtë herë për tre muajt e parë të vitit, krahasuar me të njëjtën periudhë të 2014-s.
Në shënjestër nuk janë vetëm muslimanët dhe hebrenjtë, por dhe romët, që vijnë kryesisht nga Bullgaria dhe Rumania.
Analiza dyditore mbi racizmin në Francë u krye pesë vite pas analizës së fundit, dhe diskutimet e komitetit prej 18 anëtarësh do të bëhen publike pas 15 majit.
