Për herë të parë, Kina-anëtare e përhershme e Këshillit të Sigurimit të OKB-së, është akuzuar zyrtarisht nga Kombet e Bashkuara se e ka kthyer territorin ku jeton popullsia e etnisë ujgure që i përket besimit Islam, në një kamp përqendrimi masiv.
Komiteti i OKB-së për të drejtat kundër diskriminimit racial ka hartuar një raport të plotë ku thekson se rajoni Xing-Jang është kthyer në një territor “pa asnjë të drejtë njerëzore”.
Në mbledhjen që komiteti mbajti në Gjenevë, theksohet se ka fakte të forta që muslimanët ujgurë janë vendosur në kampe përqendrimi masiv, ku mbahen pa asnjë vendim gjyqësor.
Territori ku jetojnë ujgurët muslimanë është vënë në një regjim kamerash dhe serverash që regjistrojnë çdo event të jetës së qytetarëve.
OKB zotëron fakte të forta për burgosje masive dhe familjarët e të burgosurve nuk marrin asnjë lajm mbi njerëzit e tyre.
Ditën e hënë pritet që të zhvillohet një tjetër mbledhje e Komitetit kundër diskriminimit, i cili pritet të hartojë një rezolutë që do të mbërrijë në Këshillin e Sigurimit të OKB-së, ku Kina është anëtare e përhershme. /tesheshi.com/
