Nga Blendi Gashi
Grupi i grave deputete të Kuvendit të Kosovës në shumë raste kanë ngritur zërin e tyre ndaj padrejtësive që u janë bërë grave, dhunës gjinorepor edhe ndaj rasteve kur janë fyer koleget e tyre deputete. Por, jo në të gjitha rastet. Siç duket ato po bëjnë mbrojtje selektive dhe partiake. Janë bërë dy ditë që deputetja e ‘Vetëvendosjes’ Albulena Haxhiu u ofendua rëndë nga kryekuvendari Kadri Veseli, dhe gratë deputete në vend që të mbrojtën kolegen e tyre, zgjedhën heshtjen.
Ky mos reagim mund të ‘kuptohet’ pasi në krye të grave deputete është bashkëpartiakja e Veselit, deputetja e PDK-së Blerta Deliu-Kodra.
Portali tesheshi.com ka kontaktuar deputeten Haxhiu për të marrë një mendim nga ajo se pse koleget e saj nuk i dolën në mbrojtje, por nuk e ka hapur telefonin.
Gjithashtu, kemi bërë përpjekje të kontaktojmëedhe Deliu-Kodrën, por komunikimi me të ka qenë i pamundur.
Aktivistja e VV-së pyet: Ku janë gratë deputete?
Aspak nuk i ka pëlqyer heshtja e grave deputete, aktivistës së VV-së Yllka Fejzullahu, e cila ka akzuuar ato për standarde të dyfishta.
“Ku janë gratë deputete që t’i dalin në mbrojtje koleges së tyre Albulena Haxhiu ndaj fyerjes së ulët që ju bë nga Kadri Veseli?!?!Nëse jeni për mbrojtje të femrave atëherë mos promovoni mbrojtje selektive e partiake!Nëse nuk reagoni për Albulenen Sot, atëherë nuk ju takon të reagoni Kurrë dhe për Asnjë femër Ndonjëherë!”, ka qenë reagimi i Fejzullahut.
Portalitesheshi.comka vendosur të bëj publike disa raste kur gratë deputete reaguan fuqishëm, kur u ofenduan koleget e tyre,apo edhe në raste të tjera kur femra ishte caki dhunës.
Më poshtë mund t’i lexoni disa reagime të grave deputete:
Reagimi i grave deputete ndaj dhunës gjinore ( rasti i Zejnepe Bytyqit – Berishës)
Grupi i Grave Deputete ka shprehur shqetësimin për përmasat që po merr dhuna gjinore, përherë në rritje dhe jo rrallë herë me humbje të jetëve të grave dhe vajzave tona. Deputetet theksojnë se ky është edhe një tjetër krim i tmerrshëm ndodhi në një familje shqiptare në Suharekë, një ngjarje që na përkujton se sa të brishtë jemi si shoqëri dhe si femra në veçanti.
“Zejnepe Bytyqi – Berisha është viktima e radhës e cila nuk arriti t’i shpëtojë plagëve të marra me thikë, të shkaktuara nga bashkëshorti i saj. Nuk mund të mos e themi se Diana Kastrati dhe Zejnepe Bytyqi janë viktima të dështimit të drejtësisë për t’ju ofruar mbrojtje! Dhe ky rast tregon se sundimin e ligjit duhet ta shtrijmë në të gjitha nivelet, ndërkaq kujdesin me të madh duhet ta tregojmë te vetë familjet dhe rrethi ynë i ngushtë, sepse aty kanë vendin themelet e shtetit dhe shoqërisë sonë”.
Reagimi ndaj reperit Gold AG:
Grupi i Grave Deputete në Kuvendin e Kosovës dënojnë gjuhën denigruese dhe nxitjen e urrejtjes ndaj deputetes, Alma Lama, në këngën e fundit të këngëtarit Gold AG “Shqiptar 2”.
“Gratë deputete vlerësojnë se nuk është hera e parë që kjo deputete vihet në qendër të sulmeve dhe fyerjeve nga persona të indoktrinuar që nxisin urrejtje.Ato konsiderojnë se nxitja e urrejtjes mbi baza fetare dhe fyerjet publike janë të papranueshme dhe kërkojnë që organet e drejtësisë ta adresojnë këtë çështje në mënyrën e duhur.Rasti i fundit është ai i një këngëtari të quajtur GOLD AG i cili në një këngë, përdor fjalë të ndyra dhe në kundërshtim të plotë me etikën, godet personalitete publike dhe politike. Është veçanërisht shqetësuese gjuha denigruese ndaj grave në politikë, të cilat e ngrenë zërin ndaj fenomeneve negative të shoqërisë”.
Gratë deputete, mbështetën Mimoza Kusari-Lilën
Grupi i grave deputete të Parlamentit të Kosovës kishte vizituar kryetaren e Gjakovës Mimoza Kusari-Lila, për t’i dhënë mbështetje asaj, pas kërcënimit që kishte pranuar.
Kryetarja e grave deputete, Blerta Deliu – Kodra, ishte shprehur se më të kuptuar për rastin kërcënues ndaj Kusari-Lilë, menjëherë kanë reaguar dhe kërkuar që ky rast të zbardhet nga organet e drejtësisë.
“Ne, erdhëm sot për të dhënë mbështetjen tonë për punët që kryen dhe angazhimet që ka kryetarja Mimoza Kusari Lila. Ne kemi vlerësime tëposaçme për punën dhe vizionin qeverisës të cilën e ka si dhe njiherit folëm edhe për problemet me të cilat ballafaqohet si kryetare e Komunës së Gjakovës. Në këtë mënyrë inkurajojmë kryetaren Mimoza Kusari Lila për punën që kryen karshi një shoqërie tradicionale siç është Kosova dhe përmes punës ka dëshmuar se arrin gjithnjë t’ia dalë me suksese” kishte deklaruar Kodra.
Reagimi i grave deputete ndaj Gjykatës Kushtetuese:
Grupi i Grave deputete është i zhgënjyer edhe në lidhje me dy gjykatëset gra të Gjykatës Kushtetuese.
“Grupi i Grave Deputete të Kuvendit të Kosovës vlerëson se interpretimi që i ka bërë Gjykata Kushtetuese amendamentit për futjen e kuotës gjinore edhe në qeveri, në aspektin e të drejtave të njeriut, është në shpërputhje të plotë me vetë frymën e Kushtetutës, e cila ka parim themelor barazinë gjinore.Ky interpretim shënon një hap mbrapa përsa i përket përpjekjeve për të luftuar diskriminimin me bazë gjinore që shtrihet në cdo pore të shoqërisë, përfshirë edhe institucionet publike.
Të drejtat e grave bëjnë pjesë pikërisht në korpusin e të drejtave të njeriut dhe kërkesa për barazi gjinore nuk ka si të jetë pakësim i të drejtave por barazi në të drejta. Gjithashtu kuota e propozuar si amendament është për mbrojtjen e të dyja gjinive në rastet e diskriminimit, pra kuotë neutrale.
Kuotat gjinore janë masa afirmative që nga vetë Kushtetuta e Kosovës në nenin 24.3 kërkohen të ndërmerren ndaj grupeve më pak të përfaqësuara.
Nxjerrja e përfundimit se amendamenti që synon barazinë gjinore, pakëson të drejtat dhe liritë e njeriut të përcaktuara në kapitullin e II të Kushtetutës është edhe në kundërshtim të plotë me vetë arsyetimin që ka bërë Gjykata Kushtetuese, në të cilin përmenden rezultatet dhe konventat ndërkombëtare që kërkojnë eliminimin e diskriminimit gjinor nëpërmjet ndryshimeve Kushtetuese dhe legjislative që duhet të ndërmarrin shtetet anëtare. Për shembull në arsyetim përmendet Rekomandimi i Komitetit të Ministrave të Këshillit të Evropës, i vitit 2003 ku shprehimisht thuhet që vendet anëtare duhet të marrin parasysh ndryshime kushtetuese dhe ose legjislative, përfshirë masat e veprimit pozitiv (kuotat) të cilat do të lehtësonin një pjesëmarrje më të baraspeshuar të meshkujve dhe femrave në vendimmarrjen politike dhe publike. Edhe amendamenti i propozuar nga deputetët ishte në përputhje të plotë me këtë frymë dhe me këto kërkesa.
Grupi i Grave deputete është i zhgënjyer edhe në lidhje me dy gjykatëset gra të Gjykatës Kushtetuese, njërën prej të cilave e kemi votuar me qëllimin që të mbrojë interesat e grave edhe në organin më të lartë të interpretimit të kushtetutës. Duam të rikujtojmë se vetë zonjat që kanë votuar kundër amendamentit për futjen e kuotës gjinore në Kushtetutë sot janë pjesë e Gykatës Kushtetuese aty në sajë të aplikimit të kuotave si masa afirmative për të mbërritur barazinë gjinore.
Tërheqim vëmendjen e opinionit publik se amendamenti i iniciuar nga deputetja e Alma Lama ka pasur përkrahjen e 55 deputetëve të Kuvendit, në numër të barabartë nga të dyja gjinitë, gjë që dëshmon për njohjen e situatës së pabarabartë në pushtetin ekzekutiv dhe dëshirën për ta ndryshuar atë“.
/tesheshi.com/
