Organizata Botërore e Shëndetit (OBSH) beson se është shumë herët për të folur për kulmin e infeksionit të koronavirusit në Kinë, me presidentin kinez Xi Jinping që bën thirrje për një “luftë të popullit” kundër epidemisë.
Numri i vdekjeve u rrit në 636, me më shumë se 31,000 të infektuar në ekonominë e dytë më të madhe në botë, raporton Reuters.
Shefi i ekspertëve të urgjencës së OBSH-së, Mike Ryan tha se ishte shumë e vështirë të parashikosh zhvillimin e sëmundjes që shpërtheu në Wuhan në fund të dhjetorit.
“Ne jemi akoma në qendër të një epidemie intensive,” tha ai, duke shtuar se, “të paktën në këtë pikë, situata është e qëndrueshme.”
Megjithatë, numri i të infektuarve po rritet vazhdimisht në epiqendrën e epidemisë, Provinca Hubei.
“Ne nuk kemi parë këtë rritje jashtë Provincës Hubei, as në mesin e njerëzve në Hong Kong, Makau dhe Tajvan”, shtoi Ryan.
Shefi ekzekutiv i OBSH-së, Tedros Adhanom Ghebreyesus tha se ishte “e vështirë të besosh që vetëm dy muaj më parë virusi ishte i panjohur.”
Edhe pse kanë zbuluar shumë rreth virusit, ata thonë se “duhet të gjejnë ende burimin e virusit dhe të zbulojnë fuqinë dhe aftësinë e tij për t’u përhapur”.
Presidenti kinez, ndërkohë, ka deklaruar një “luftë të popullit” kundër përhapjes së shpejtë të koronavirusit, i cili ka ndikuar që bota të ngadalësojë ekonomitë e deri në karantinimin e kroçerave.
Në një përpjekje të re për të parandaluar panikun global, Xi tha se mobilizimi i fortë i Kinës dhe përvoja e gjerë e shëndetit publik do të ndihmojë në mposhtjen e koronavirusit.
“I gjithë shteti është përgjigjur me masat më të forta dhe më të rrepta të parandalimit dhe kontrollit, duke filluar një luftë popullore për të parandaluar dhe kontrolluar epideminë,” tha presidenti kinez. /tesheshi.com/
