Mbulimi i pabarabartë i vaksinave dhe lehtësimi i masave parandaluese e kanë sjellë Evropën në një “pikë kritike” të pandemisë, përsëri me një numër pothuajse rekord të infeksioneve dhe një parashikim prej 500,000 vdekjesh deri në shkurt.
Hans Kluge, Drejtori i OBSH-së për Evropën, tha se të 53 vendet në rajon përballen me “një kërcënim real të një rishfaqjeje të COVID 19 ose tashmë po e luftojnë atë” dhe u bëri thirrje qeverive të rifusin ose vazhdojnë masat sociale dhe të shëndetit publik.
Ai tha se një projeksion i besueshëm tregon se nëse ritmi aktual vazhdon, mund të ketë gjysmë milioni viktima të tjera COVID në Evropë deri më 1 shkurt.
Në një konferencë virtuale në Kopenhagë, Kluge tha se shkalla aktuale e transmetimit të virusit nëpër vendet evropiane është shumë shqetësuese dhe shtoi se numri i rasteve të reja po i afrohet niveleve rekord dhe se lloji delta i koronavirusit është shkaku i rritjes së shpejtë.
Ai gjithashtu theksoi se trendi i rritjes është regjistruar në të gjitha moshat, por më shqetësuesja është transmetimi i përshpejtuar i virusit tek të moshuarit.
Kjo, siç paralajmëroi ai, çon në një numër më të madh të rasteve të rënda të sëmundjes dhe vdekjes, me 75 për qind të vdekjeve në mesin e atyre mbi 65 vjeç.
Ai tha se edhe në vendet me shkallë të lartë vaksinimi, imunizimi mund të ndihmojë vetëm pjesërisht.
Vaksinat bëjnë atë që është premtuar
Në Evropë, vetëm 47 për qind e popullsisë totale është vaksinuar, pavarësisht se janë shpërndarë një miliard doza vaksinash, dhe në tetë vende, të paktën 70 për qind e njerëzve janë imunizuar plotësisht, ndërsa në dy vende shkalla është nën dhjetë për qind, tha Kluge.
“Mesazhi ka qenë gjithmonë: bëni gjithçka. Vaksinat bëjnë atë që premtohet: parandalojnë format e rënda të sëmundjes dhe veçanërisht vdekshmërinë. Por ato janë pasuria jonë më e madhe vetëm nëse përdoren paralelisht me masat shëndetësore publike dhe sociale”, tha drejtori i OBSH-së.
Ai vlerësoi se 188,000 jetë mund të shpëtohen deri në shkurt nëse ka vendosje universale të maskave në Evropë.
Evropa ka parë një rritje prej 55 për qind të të infektuarve me COVID 19 në katër javët e fundit, pavarësisht nga disponueshmëria e vaksinave, të cilat duhet të shërbejnë si një paralajmërim për rajonet e tjera, thanë zyrtarët e OBSH-së.
Drejtori i Programit për Situatat Emergjente të OBSH-së, Mike Ryan tha se disa vende evropiane kanë “mbulim vaksinimi nën numrin optimal” pavarësisht nga disponueshmëria e vaksinave.
“Është një paralajmërim për botën, për të parë se çfarë po ndodh në Evropë, pavarësisht nga disponueshmëria e vaksinimit,” tha Ryan në një konferencë shtypi. /tesheshi.com/
