Organizata për Bashkëpunim Rajonal dhe Integrime Evropiane (OBRIE) vlerëson se qeveria e Maqedonisë ka vazhduar ta thellojë borxhin duke marrë hua nga organizatat ndërkombëtare, si FMN-ja dhe Banka Botërore.
Këto mjete thuhet se do të dedikohen për zbrazëtirat buxhetore, por në plan të parë duket qartë prioriteti për të përmbyllur projektet “Shkupi 2014”.
“Qëllimi i kësaj qeverie është që të arrijë ta rrumbullakojë projektin shumëmilionësh para zgjedhjeve parlamentare, edhe pse prioritet duhet të jetë jeta e qytetarëve dhe përmirësimi i kushteve të tyre jetësore. Në këtë plan, shqetësuese është mungesa totale e investimeve kapitale infrastrukturore në komunat shqiptare. Qeveria ka mungesë të strategjisë për të rivitalizuar zonat e varfra, të cilat janë kryesisht me popullsi shqiptare, ku shkalla e dendësisë është tejet e lartë,” thekson OBRIE.
Sipas kësaj organizate, edhe partitë shqiptare, si pjesë e bashkëqeverisjeve, deri tani nuk kanë pasur dhe nuk kanë plan strategjie për zhvillimin e këtyre zonave.
“Partitë shqiptare nuk kanë qenë të afta të sjellin investime në zonat e varfra shqiptare për krijimin e kushteve për vende të reja të punës, për ndihmën dhe legalizimin e ndërmarrjeve të vogla dhe të mesme, për tërheqjen e investimeve të reja, për përmirësimin e transportit në zonat e largëta, për hapjen e pikave të reja kufitare në pjesën veriperëndimore me Kosovën dhe Shqipërinë,” vë në dukje OBRIE, duke shtuar se kjo gjendje tregon për një solidaritet totalisht të munguar për të integruar dhe mbështetur një zhvillim të qëndrueshëm në provincat e humbura shqiptare.
Sipas OBRIE-së, në kohën kur BE-ja po shpenzon miliarda euro fonde për zhvillim, për rritjen e konkurrencës, punësimit, për mjedisin, etj., qeveria e Maqedonisë po shpenzon miliona euro në ngritjen e përmendoreve historike të debatueshme, të cilat nuk gjenerojnë të ardhura, por thellojnë hendekun në planin ndëretnik dhe ndërfetar.
Në Maqedoni akoma nuk flitet për çështjen e Konferencës Donatore Ndërkombëtare, pas konfliktit të vitit 2001, për rivitalizimin e zonave që u përfshinë në këtë konflikt.
Më 12 mars të vitit 2002, në Konferencën Ndërkombëtare Donatore në Bruksel, Maqedonia përfitoi mbi 500 milionë euro për përmirësimin e gjendjes pas konfliktit të armatosur të 2001-shit. Nga këto fonde të përfituara, 307 milionë euro ishin mjete financiare që menjëherë shkuan në llogarinë e shtetit, prej të cilave 185 milionë ishin paraparë për mbështetjen e bilancit pagesor në buxhet, që do të thotë para për rroga, pagesa dhe mbulim të zbrazëtive të buxhetit, 85 milionë euro për rikonstruktimin e objekteve të rrënuara nga lufta, dhe 49 milionë për implementimin e Marrëveshjes së Ohrit.
Pas kalimit të 14 viteve nga kjo konferencë, qeveritë dhe institucionet në Maqedoni, por edhe zyrat e europerëndimore, nuk kërkuan asnjëherë llogari apo revizion të plotë lidhur me harxhimin e këtyre shumave,” reagon organizata joqeveritare OBRIE. /tesheshi.com/
