Presidenti amerikan në largim, Barack Obama, ka paralajmëruar se vendi i tij do të ketë një kundërpërgjigje për ndërhyrjen në fushatën elektorale presidenciale nëpërmjet sulmeve kibernetike ruse.
Obama ka thënë se po pret një raport final që ai ka urdhëruar mbi sulmet kibernetike ruse, duke premtuar në të njëjtën kohë se do të ketë një përgjigje.
“Mendoj se nuk ka dyshim që kur një qeveri e huaj përpiqet të ketë ndikim në integritetin e zgjedhjeve tona… ne duhet të ndërmarrim veprim,” mësohet të ketë thënë presidenti amerikan në një intervistë për National Public Radio.
“Dhe ne do të ndërmarrim veprim në një kohë dhe vend të zgjedhur nga ne. Një pjesë mund të jetë e qartë dhe e bërë publike, e një pjesë mund të mos jetë.”
Siç thotë BBC-ja, nuk është e qartë se çfarë veprimesh do të ndërmarrë SHBA-ja, teksa Obama e lë postin më 20 janar.
Rusia akuzohet për ndërhyrje në postën elektronike të Partisë Demokratike dhe të një ndihmësi të Hillary Clinton-it. Një zëdhënës i Shtëpisë së Bardhë deklaroi dje se presidenti Putin ishte i përfshirë në sulmet kibernetike.
Akuzat janë mohuar nga Kremlini, por ato i ka hedhur poshtë dhe Donald Trump, që i ka cilësuar qesharake dhe të motivuara politikisht. /tesheshi.com/
