Presidenti amerikan Barack Obama paralajmëroi se Afrika nuk do të përparojë nëse liderët e saj refuzojnë të largohen pasi u përfundon mandati.
Ai gjithashtu bëri thirrje për t’i dhënë fund “kancerit të korrupsionit”, duke thënë se ai heq paratë që duhen për zhvillimin. Obama i bëri këto komente në adresimin e parë në histori nga një president amerikan përpara 54 liderëve të Unionit Afrikan në kryeqytetin e Etiopisë, Addis Ababa.
Fjalimi përbën edhe pikën kulmore të turit pesëditor të Obamës në Afrikë. Më herët ai vizitoi Kenian.
“Liderët afrikanë duhet të respektojnë kushtetutat e tyre dhe të tërhiqen në fund të mandatit”, tha Obama. Në disa shtete europiane, presidentët nuk kanë pranuar humbjen në zgjedhje duke e përshkallëzuar situatën në dhunë, rasti më i fundit në Burundi.
“Askush nuk duhet të jetë president i përjetshëm”, tha Obama, duke shtuar, “nuk e kuptoj përse njerëzit duan të qëndrojnë kaq gjatë, sidomos kur kanë marrë kaq shumë para”.
“Demokracia ekziston vetëm si emër e jo si substancë, kur gazetarët burgosen dhe aktivistët kërcënohen”, tha ai, ndërsa korrupsionin e cilësoi një të keqe që po thith miliarda dollarë nga Afrika, para që mund të përdoreshin për të ndërtuar shkolla dhe spitale./tesheshi/
