Demokratët morën një hap të madh drejt unitetit të partisë të enjten, pasi Bernie Sanders u zotua se do të punojë bashkë me Hillary Clinton për të mposhtur Donald Trump në nëntor të këtij viti; kurse presidenti Barack Obama dhe zv/presidenti Joe Biden, edhe formalisht e kanë mbështetur Hillary-n për president të SHBA.
“Unë jam me të”, tha Obama në një mesazh të inçizuar dhe të postuar në web-faqen e fushatës së Clinton, të cilën e mundi para 8 viteve.
“Unë e di sa është e vështirë kjo punë. Për këtë arsye jam i sigurt se Hillary do ta kryejë mirë punën”, tha Obama. “Nuk besoj se ka pasur ndonjëherë njeri më të kualifikuar për të udhëhequr këtë zyrë se ajo”, shtoi kreu i Shtëpisë së Bardhë.
Ky njoftim u bë pas takimit privat në zyrën ovale mes Obamas dhe rivalit demokrat të Clinton-it, Bernie Sanders.
Sanders në anën tjetër, tha se zgjedhja e Trump për president të SHBA do të ishte fatkeqësi e madhe, dhe se ai do të punojë shumë për t’u siguruar që kjo të mos i ndodhë kurrë vendit të tij. /tesheshi.com/
