Byroja Qendrore Palestineze e Statistikave (PCBS) ka bërë të ditur përmes një komunikate shtypi se numri i palestinezëve në botë ka arritur në shifrën 12.37 milionë.
Sipas organizmit të mësipërm të statistikave, 4.75 milionë palestinezë jetojnë në shtetin e Palestinës, 1.47 milionë gjenden në Izrael, 5.46 janë në vendet arabe, e rreth 685 mijë e çojnë jetën në vende të huaja.
Nga banorët brenda shtetit të Palestinës, 2.90 milionë banojnë në Bregun Perëndimor, dhe 1.85 milionë në Rripin e Gazës.
Numri i palestinezëve që jetojnë në Izrael arriti në 1.47 milionë në fundin e këtij viti, rreth 34.8 për qind e të cilëve janë nën moshën 15 vjeç.
6.22 milionë është numri i arabëve në fund të 2015-ës në Palestinën historike. Kaq ishte numri i hebrenjve vitin e shkuar, sipas Byrosë Qendrore Izraelite të Statistikave, e ky numër pritet të arrijë 6.34 milionë me mbylljen e këtij viti.
PCBS-ja parashikon që arabët dhe hebrenjtë të jenë në numër të barabartë para fundit të 2017-ës. Kurse nga fundi i 2020-ës, arabët në Palestinën historike do të jenë 7.13 milionë, përkundër 6.96 milionë hebrenjve. /tesheshi.com/
