Presidenti turk po zhvillon një vizitë zyrtare në Arabinë Saudite, të cilën e ka shfrytëzuar për të bërë më pas umren në Mekë, pelegrinazhin që, ndryshe nga haxhi, mund të kryhet në çdo kohë të vitit.
Delegacioni turk, i prirë nga Erdogani, ka mbërritur mbrëmjen e së martës në Xheda, për të marrë
më pas rrugën për në Mekë. Presidenti e ka kryer umren i shoqëruar nga e shoqja, Emine Erdogan, si dhe nga një numër ministrash të kabinetit qeveritar turk, si ai i Ekonomisë, i Energjitikës, e nga ministri i Jashtëm.
Dyert e Qabes janë hapur për Erdoganin me urdhër të mbretit Selman, teksa presidenti karizmatik është parë me veshjen e bardhë karakteristike të pelegrinazhit.
Umres në Mekë i ka paraprirë ditën e djeshme takimi me mbretin saudit, Selman bin Abdulaziz, në Riad, ku është diskutuar për situatën e trazuar në rajon e për marrëdhëniet dypalëshe mes Arabisë Saudite dhe Turqisë.
Dy vendet kanë rënë dakort të formojnë një këshill të bashkëpunimit strategjik për të forcuar bashkëpunimin ushtarak, ekonomik dhe në fushën e investimeve, ka bërë të ditur të martën ministri i Jashtëm saudit. /tesheshi.com/
