Harta e Shqipërisë po lyhet me mavi në të gjithë pjesët e saj.
Që kur ka nisur numërimi i votave, e deri aktualisht kur janë nxjerrë rezultatet për 20% të kutive në të gjithë vendin, PS ka qenë në krye, duke thelluar gjithnjë e më shumë rezultatin.
Ndërkohë që janë numëruar 1357 nga 5362 kuti në të gjithë Shqipërinë, PS udhëheq me mbi 50.33% të votave, e ndjekur nga PD me 27.74% të votave dhe LSI me 15.35% të votave.
Ndërsa PS sheh rritje të ndjeshme në vota në krahasim me 4 vite më parë, e kundërta ndodh me PD që është rrudhur në shifra në këto zgjedhje.
Por rritje në shifra nuk vetëm PS; një rritje të ndjeshme ka edhe LSI që duket se do të ketë më tepër deputetë se në legjislaturën e lënë pas.
Në Parlament pritet të jetë edhe PDIU.
Nga të dhënat e deritanishme: PS ka 75 mandate, PD 41 mandate, LSI – 20 mandate, PDIU 3 mandate, PSD 1 mandat.
Në një reportazh të sajin Deuutsche Welle thekson se Rama ka marrë konfirmimin për vazhdimin e reformës në drejtësi.
“Partia Socialiste e Shqipërisë duket të ketë fituar pothuajse gjysmën e votave të dielën, me votimin e zgjatur për shkak të pjesëmarrjes së ulët.
Socialistët e Kryeministrit Edi Rama mblodhën midis 45 dhe 49 përqind të votave, sipas sondazheve paraprake. Ndërkohë, Partia Demokratike e opozitës duket se ka siguruar mes 30 dhe 34 përqind.
Rama është i gatshëm të fitojë një shumicë në mënyrë që të mund të shtyjë reformat që synojnë zbutjen e rrugës për hyrjen në Bashkimin Evropian – kryesisht një reformë të sistemit gjyqësor të korruptuar të vendit. Parashikimet fillestare u japin socialistëve 71 deri 75 vende në parlamentin me 140 vende.
Partneri i tanishëm i koalicionit Rama, Lëvizja Socialiste për Integrim (LSI), mblodhi rreth 19 përqind të votave.”-shkruan Deutsche Welle. /tesheshi.com/
