Skënder Gjinushi i ka ofruar një sfidë presidentit Meta, një ditë pasi ky i fundit nuk e dekretoi si kryetar të ri të Akademisë së Shkencave, me pretendimin se kandidoi për këtë post duke qenë njëherësh dhe në drejtimin e PSD-së.
Por për Gjinushin, vetë Meta e ka bërë një proçkë të tillë më parë.
“Vetë Presidenti ka kandiduar duke qenë kryetar partie. Le të jap shembullin, pra të jap dorëheqjen për këtë shkak. Unë nuk do e jap dorëheqjen për këtë shkak”, tha Gjinushi në një prononcim për TCH.
E megjithatë, aktin e Metës ai e quajti nul dhe tha se presidentit nuk mund të ndërhyjë në një proces krejt autonom siç ka qenë zgjedhja e tij.
“Rezultati i zgjedhjeve është bërë publikisht i njohur dhe zyrtarisht dhe ligjërisht. Dhe është një rezultat i pa cënuar dhe i paprekur nga askush. Presidenti i Republikës nuk mund ta zhbëjë procesin zgjedhor të zhvilluar pranë këtyre institucioneve autonome. Kështu që dekreti është haptas nul, haptas një vendim absolutisht i pavlefshëm, sepse nuk ka asnjë referencë në ligjin e Akademisë së Shkencave, ku thuhet se mund të refuzohet emërimi”, u shpreh Gjinushi, duke shtuar se akti i Metës mund të ketë pasoja të rënda juridike si precedent. /tesheshi.com/
