Nuk ka gjetur përgjigjen e pritur një kërkesë e 150 specialistëve, akademikëve dhe shkencëtarëve për t’i shtyrë apo pezulluar Lojërat Olimpike të kësaj vere në Rio de Zhanejro të Brazilit.
Organizata Botërore e Shëndetësisë (WHO) është shprehur kundër kërkesës së mësipërme, duke deklaruar se pezulllimi apo ndryshimi i vendit të zhvillimit të Lojërave Olimpike nuk ka për ta ndryshuar në mënyrë domethënëse përhapjen ndërkombëtare të virusit.
“Bazuar në vlerësimin aktual,” thotë njoftimi i Organizatës Botërore të Shëndetësisë, “nuk ka justifikim publik shëndetësor për shtyrjen apo pezullimin e lojërave.”
Një letër e hapur, e dërguar të premten WHO-së nga një numër i madh shkencëtarësh e akademikësh e quante joetike zhvillimin e Lojërave Olimpike. Ata vinin në pah dobësinë e sistemit shëndetësor në Brazil si argument për shtyrjen apo zhvillimin gjetiu të aktivitetit sportiv mbarëbotëror.
Komiteti Olimpik Ndërkombëtar është shprehur gjithashtu se nuk ka arsye për t’i shtyë apo lëvizur lojërat nga virusi Zika.
Brazili është mes 60 vendeve apo territoreve ku vijon përhapja e virusit Zika nëpërmjet mushkonjave. /tesheshi.com/
