Aktiviteti i Euroleague-s është nga të paktët që nuk ka njohur pushim në këtë fundviti. Janë luajtur mbrëmë pesë prej takimeve të javës së 15-të, ndërkohë që tre sfida të tjera do të luhen sonte.
Crvena Zvezda i shkaktoi CSKA-së së Moskës humbjen e tretë sezonale në “Kombank Arena” të Beogradit. Me përjashtim të dhjetëminutëshit të tretë të lojës, të zotët e shtëpisë kryesuan gjatë gjithë pjesës tjetër të lojës.
Rezultati përfundimtar qe 78-67 për skuadrën serbe, që me fitoren e shtatë të saj e sheh veten në vend të tetë në renditje. Përkundër humbjes, CSKA vijon ta kryesojë Euroleague-n.
Humbje pësoi gjithashtu dhe Fenerbahçe në Athinë, ku u mund 71-62 nga Olimpiakosi. Turqit u kujtuan vonë të luajnë, i fituan dy fraksionet e fundit të ndeshjes, por vetëm kaq.
Për Olimpiakosin qe fitorja e dhjetë sezonale. Veç ekipit grek, janë dhe Reali i Madridit e Baskonia Vitoria Gasteiz me po kaq fitore. Për Fenerbahçen, të paraqitur shumë më mirë sezonin e shkuar, kjo ishte humbja e gjashtë.
Reali i Madridit fitoi në sekondat e fundit ndaj Anadollu Efesit në “Abdi Ipekçi Arena”. Një ndeshje mjaft e ekuilibruar, që u fitua 78-80 nga Reali.
Luftë e fortë në përballjen Baskonia Vitoria Gasteiz – Makabi i Tel-Avivit, të fituar 101-88 nga vendasit. Spanjollët i bënë një mbyllje mjaft të mirë vitit, me dhjetë fitore e pesë humbje. I kundërt bilanci i izraelitëve në 15 javë: pesë fitore e dhjetë humbje.
Në një tjetër takim të mbrëmjes, EA7 Emporio Armani Milan u mund 70-78 në shtëpi nga Zhalgiris Kaunas. /tesheshi.com/
