Një zjarr i rënë gjatë natës në spitalin e Durrësit ka çuar në evakuimin e afro 80 pacienteve. Rrezik për ta ka qenë tymi e jo flakët, duke u kërcënuar nga asfiksia. Dyshohet se zjarri është shkaktuar nga mbingarkesa e rrjetit elektrik.
Një shkëndijë elektrike në një nga dhomat e pavionit të Neurologjisë, përmes një sistemi zinxhir ka bërë djegjen e kabllove elektrike dhe përhapjen e zjarrit e gazrave ndotës në katet e tjera të godinës, raporton TCH.
Ndërsa në një prononcim për Report Tv, inxhinieri elektrik i spitalit, Edmond Palodhi, bëri snjë sqarim më të detajuar mbi atë që ka ndodhur.
“Zjarri ka rënë nga ngarkesa në rrjetin elektrik për shkak të stinës dhe ngrohseve në ambientet e spitalit. Zjarri si fillim ka rënë në katin e parë tek pavioni i neurologjisë dhe më pas, meqënse janë me një kolonë të gjithë katet e rrjetit, ka avancuar në kat të dytë, të tretë dhe të katërt.
Për evakuimin e të sëmurëve është vepruar në mënyrë të shpejt nga personeli për arsye se janë edhe shkallët e emergjencës dhe zjarri nuk ishte i përmasave të mëdha. Ishte thjesht tym dhe ndotja e ajrit nga djegia e elementëve që përbëjnë kabujt elektrik”, tha inxhinieri.
Kujtojmë se javë më parë, gjatë ditëve të tërmetit, një lajm mbi spitalin e Durrësit si në rrezik nga goditjen e tërmetit, çoi kryeministrin Rama të nxitonte drejt miratimit të paketës Anti-Shpifje. Sipas tij, lajmi që nuk ishte veçse një fake news, bëri që të humbte jetën një i plagosur nga tërmeti, në një ikje nën panik që aty. /tesheshi.com/
