Mediat në Tiranë po e cilësojnë një skandal të shtetit shqiptar vendimin e Gjykatës Kushtetuese të Shqipërisë për ekstradimin e një ushtari të UÇK-së në Serbi.
Në një proces prej 3 vitesh ka qenë Gjykata Kushtetuese ajo e cila me vendimin e datës 22 maj 2017 i ka hapur rrugë ekstradimit drejt Serbisë të ish- ushtarit të UÇK Skënder Harizaj, ish- ushtarak në zonën operative të Shalës, raporton Report TV.
Fillimisht ishte Gjykata e Kukësit ajo që refuzoi ekstradimin e Harizaj drejt Serbisë me vendimin Nr. 111, datë 15.06.2014.
Por ky vendim u apelua dhe Gjykata e Apelit në Shkodër ktheu në fuqi ekstradimin për llogari të Ministrisë së Drejtësisë serbe.
E në këtë gjykim që përfundoi më pas në Gjykatë të Lartë, Harizaj së bashku me avokatin e tij pretenduan se do t’i rrezikohej jeta dhe do të diskriminohej, pasi Skënder Harizaj kishte qenë luftëtar i UÇK.
Por sipas gjykatës, ky pretendim s’qëndronte, pasi Harizaj nuk ishte hetuar dhe dënuar për krime lufte por për veprën penale të kalimit të paligjshëm të kufirit me Serbinë dhe trafikimit të qenieve njerëzore.
Kolegji Penal i Gjykatës së Lartë e la në fuqi ekstradimin.
Ky vendim tashmë është lënë në fuqi dhe nga Gjykata Kushtetuese, duke shënuar rastin e parë të lejimit të ekstradimit të një ish-luftëtari të UÇK-së nga drejtësia shqiptare për llogari të drejtësisë Serbe.
Duket absurd ky vendim ndërkohë që gjithë liderët shqiptarë i bënin thirrje pak javë më parë Francës që të mos ekstradonte Ramush Haradinajn. Drejtësia franceze e ndalioi për llogari të Serbisë ish-komandantin e UÇK-së dhe ish-kryeministrin e Kosovës Ramush Haradinaj, por vendimi i gjykatës u dha në favor të tij./tesheshi.com/
