Një anëtare e NATO-s, Norvegjia planifikon ta çojë në një nivel më të lartë aftësinë e vet mbrojtëse, për t’i bërë ballë një Rusie gjithnjë e më të paparashikueshme.
“Ne kemi një fqinj në lindje gjithnjë e më të paparashikueshëm, që po e forcon kapacitetin e tij ushtarak, duke treguar gatishmërinë për ta përdorur forcën ushtarake si një instrument politik.”
Janë këto fjalët e kryeministres norvegjeze, Erna Solberg, të thëna në një konferencë shtypi në Oslo.
“Rrethanat gjeopolitike kanë ndryshuar fatkeqësisht në mënyrë domethënëse për keq në vitet e fundit.”
Ajo ka deklaruar se fuqia aktuale ushtarake e vendit nuk i përshtatet situatës gjeopolitike.
Norvegjia synon t’i shtojë arsenalit ushtarak avionë të rinj gjuajtës e nëndetëse. Parashihet blerja e 52 avionëve F-35, si edhe e katër nëndetëseve.
Gjatë 20 viteve do të ketë një rritje të buxhetit të mbrojtjes me 17.5 miliardë euro.
Planet e reja ushtarake do të duhet të kalojnë më së pari në parlament përpara se të nisin të vihen në zbatim. /tesheshi.com/
