Medalja Nobel e gazetarit rus Dmitry Muratov u shit në ankand për 103.5 milionë dollarë të hënën dhe shuma e mbledhur do të shkojë për të ndihmuar fëmijët ukrainas të zhvendosur.
Shuma do t’i dhurohet programit të UNICEF-it për të ndihmuar fëmijët e zhvendosur nga Ukraina, tha shtëpia e ankandeve Heritage Auctions, transmeton AFP dhe Reuters.
Muratov, kryeredaktor i Nova Gazeta dhe një kritik i ashpër i Kremlinit, ndau Çmimin Nobel për Paqe me gazetaren filipinase Maria Ressa vitin e kaluar.
Ai ia kushtoi atë gjashtë gazetarëve të tij që vdiqën për shkak të punës së tyre.
Nova Gazeta njoftoi në fillim të marsit se do të heqë materialet në lidhje me veprimet ushtarake ruse në Ukrainë nga faqja e saj për shkak të censurës, në përgjigje të kërcënimeve për persekutim kritik të gazetarëve dhe qytetarëve që nuk mbështesin qëndrimin zyrtar të qeverisë për luftën në Ukrainë.
Në një video të publikuar nga Heritage Auctions, Muratov tha se fitimi i çmimit Nobel “ju jep një shans për t’u dëgjuar”.
“Mesazhi më i rëndësishëm sot është që njerëzit të kuptojnë se po ndodh një konflikt dhe se ne duhet të ndihmojmë njerëzit që vuajnë më shumë”, shtoi gazetari rus, duke theksuar “fëmijët në familjet e refugjatëve”. /tesheshi.com/
