Njeriu që zgjidhi ngërçin shqiptar të çadrës, Zëvendës/Ndihmës Sekretari Hoyt Brian Yee, ishte në Beograd ku deklaroi se Shtetet e Bashkuara do të vazhdojnë të jenë të pranishme në Ballkan për të mbështetur kursin perëndimor dhe ndjekur me vëmendje qasjen e Rusisë në rajon..
“E dimë nga përvoja se synimet prapa shumë veprimeve ruse nuk janë të mira dhe nuk janë në interes të vendeve të rajonit“, tha Hoyt Yee pas një takimi me Presidentin e emëruar, Aleksandër Vuçiç, duke marrë si shembull ngjarjet e tetorit të vitit të kaluar në Mal të Zi, kur autoritetet e Podgoricës thanë se rusët ishin përfshirë në një përpjekje për grusht shteti, pjesë e orvatjeve për të penguar anëtarësimin e vendin në NATO.
“Shpresojmë se Rusia do të luajë një rol konstruktiv në Ballkan, sic ka bërë në të kaluarën. Por duhet të jemi syçelë. Kudo që është e mundur, Shtetet e Bashkuara do të bashkëpunojnë me Rusinë, por atje ku ndeshen interesat, vlerat dhe synimet tona, do t’i mbrojmë fuqishëm interesat amerikane sikurse edhe interesat e aleatëve dhe partnerëve tanë“, tha diplomati i lartë amerikan, raporton VOA.
Sipas tij, politika amerikane ndaj Ballkanit nuk ka ndryshuar edhe pas ardhjes në Shtëpinë e Bardhë të Donald Tramp si President. /tesheshi.com/
