Ambasadori spanjoll në Tiranë Vicente Canelles Montero, ofroi formulën e zgjidhjes sës krizës shqiptare, duke potencuar fillimisht se janë vetë palët ato që duhet ta zgjidhin pa pritur që të ndërhyjnë të huajt, më saktë ambasadorët.
“Është e vërtetë që situata politike në Shqipëri është e tensionuar por nuk janë ambasadorët e huaj ata që mund të vendosin sesi mund të kapërcehet kjo gjë. Vetëm shqiptarët mund të vendosin, sigurisht duke respektuar ligjin, shtetin e të drejtës, Kushtetutën. Jeni ju ata që duhet të vendosni sesi mund të dilni nga ky moment i vështirë”, tha përfaqësuesi i Madridit në Tiranë, duke folur nga Korça ku u ndodh për vizitë.
“Në Spanjë, kur kemi hasur momente të tilla të vështira, ato janë zgjidhur me dialog dhe me të gjitha palët politike të cilat janë treguar të gatshme për të hequr dorë nga disa pozicione fillestare dhe për të gjetur një pikë dakordësimi mes tyre. Duhet të gjendet një zgjidhje dhe pa kaluar shumë kohë madje”, shtoi diplomati spanjoll. /tesheshi.com/
