Pasaporta siriane e gjetur pranë njërit prej atentatorëve që ndërruan jetë gjatë sulmeve të mbrëmshme në Paris ishte e një personi i cili kishte kaluar në Greqi në muajin tetor. Lajmi është bërë i ditur nga Ministri grek i Rendit Publik, Nikos Toskas.
“Poseduesi i pasaportës siriane të gjetur në vendin e sulmit të terroristëve ka kaluar në ishullin Leros më 3 tetor 2015 dhe është regjistruar në bazë të rregullave të Bashkimit Europian, sipas vendimeve të samitit të BE-së për menaxhimin e krizës së refugjatëve”,- tha ministri në një deklaratë me shkrim.
“Nuk e dimë nëse pasaporta është kontrolluar dhe sigluar edhe në shtete të tjera. Do ët vijojmë me marrjen e masave për të mbrojtur vendin tonë dhe Europën në rrethana të tilla”,- shton ai.
Sipas burimeve nga qeveria greke, por jo konfirmimeve zyrtare, autoritetet franceze i kanë kërkuar ditën e sotme informacion Athinës në lidhje me dy të dyshuar, pas sulmeve të mbrëmjes së djeshme në Paris. Atentatori i dyshuar me pasaportë siriane është gjetur i vdekur në zonën pranë Stade de France.
Që prej nisjes së vitit 2015, mbi 600 mijë refugjatë emigrantë kanë mbërritur në brigjet e Greqisë dhe pjesa më e madhe e tyre janë sirianë të arratisur nga lufta. Ata, pasi regjistrohen në ishujt greke, vijojnë udhëtimin e tyre në Europën Qendrore dhe atë Perëndimore./tesheshi.com/
