Anija e shpëtimit e blerë me fondet e artistit kontrovers Banksy u sekuestrua nga autoritetet italiane pas një misioni të suksesshëm shpëtimi në të cilin u shpëtuan 37 emigrantë nga Deti Mesdhe, njoftoi artisti britanik dhe ekuipazhi i anijes së shpëtimit në rrjetet sociale.
Kjo ndodhi vetëm disa ditë pasi Banksy krijoi një performancë në të cilën një model i një varke me kukulla refugjatësh u lëshua në audiencë gjatë performancës së grupit rock britanik Idles në festivalin muzikor në Glastonbury, raporton The Guardian i Londrës.
Për këtë ka reaguar ministri britanik i Brendshëm, James Cleverly, i cili e ka vlerësuar si “të neveritshme” performancën e tij.
Në një deklaratë të postuar në Instagram, Banksy tha se anija e shpëtimit që ai financoi, MV Louise Michel, “shpëtoi 17 fëmijë të pashoqëruar, mes njerëzve të tjerë të mbytur me anije, nga Deti Mesdhe” të hënën mbrëma.
“Si ndëshkim për këtë mision shpëtimi, autoritetet italiane mbajtën anijen, që më duket një akt i neveritshëm dhe i papranueshëm”, tha artisti britanik.
Të mbijetuarit zbarkuan në Siçili
Një llogari e mediave sociale e regjistruar me emrin MV Louise Michel raportoi se anija u ndalua nga autoritetet italiane në portin e Lampedusas, 20 ditë pasi shpëtoi 37 emigrantë.
“Ekuipazhi ynë është urdhëruar të zbarkojë çdo të mbijetuar në portin e Pozzallo, Siçili. Meqenëse kushtet e motit në itinerar ishin të këqija për lundrim të sigurt, ekuipazhi ynë vendosi të kërkonte strehë pranë Lampedusas, ku gjatë natës morëm lejen për të zbarkuar të gjithë të mbijetuarit”, u njoftua urdhri i anijes MV Louise Michel.
Ekuipazhi i MV Louise Michel e përshkroi ndalimin e anijes si një “lojë politike” dhe bëri thirrje për lirimin e saj. /tesheshi.com/
