Një incident i pazakontë ka ndodhur në kuvendin e Kosovës. Ndërsa institucioni ligjvënës ka hapur dyert nga dje për bashkatdhetarët që të vizitojnë ndërtesën, një prej tyre ka hequr fotografinë e presidentit të ndjerë Ibrahim Rugova, nga holli ku qëndronte.
Bashkëatdhetari ka kërkuar që në institucionin ligjvënës të jetë edhe foto e komandantit legjendar Adem Jashari.
Pas këtij incidenti në hollin e kuvendit ka reaguar kryeparlamentari, Kadri Veseli dhe Lidhja Demokratike e Kosovës (LDK).
Kryekuvendari Veseli, ka dënuar ashpër incidentin duke thënë se pjesëtarët e policisë që kujdesen për sigurinë në kuvend, kanë reaguar menjëherë dhe pas kryerjes së hetimeve të nevojshme, fotografia e ish-presidentit Rugova është kthyer në vendin e saj.
“Kuvendi i Kosovës vazhdon të jetë i hapur për vizita nga të gjithë bashkatdhetarët tanë, por kërkon nga të gjithë vizitorët që gjatë qëndrimit në mjediset e kuvendit, të respektojnë normat e sjelljes”, ka deklaruar Veseli.
Kuvendin e Kosovës ka hequr fotografinë e Presidentit Ibrahim Rugova. Për këtë akt ka reaguar edhe Lidhja Demokratike e Kosovës.
Ndërsa, LDK parti kjo të cilën për disa vite e drejtoi presidenti i ndjerë Rugova, aktin e ka quajtur të shëmtuar dhe kriminal.
Kryetari i grupit parlamentar, Ismet Beqiri, në një prononcim për mediat kosovare, bashkatdhetarin që e ka larguar foton e Rugovës e ka quajtur bandit.
“Unë u informova. Isha në afërsi të Kuvendit që është heq fotografia e presidentit Rugova nga një kriminel faktikisht. Ne e dënojmë ashpër këtë akt të shëmtuar sepse është heq fotografia e një personaliteti të veçantë të vendit dhe kjo është krejt akt kriminal të cilin duhet të dënohet edhe duhet me që të merren organet e drejtësisë”, ka pohuar Beqiri.
/tesheshi.com/
