Publikimi i parë i librit “Mein Kampf” të Adolf Hitlerit në Gjermani që pas Luftës së Dytë Botërore ka rezultuar në bestseller, një e dhënë surprizë kjo ndërsa libri po i ridrejtohet shtypshkronjës për herë të gjashtë. Publikuesi i librit thotë se shitjet janë të mëdha, sa tregu ka nevojë për ribotim.
Instituti i Historisë Bashkëkohore të Mynihut, tha se që nga dalja e parë në treg, në janarin e vitit të shkuar, janë shitur rreth 85 mijë kopje të versionit të ri të pajisur me shënime, të manifestos antisemitike të Hitlerit.
Larg së promovuri ideologjinë e të djathtës ekstreme, ribotimi ka shkaktuar një debat për ringjitjen e pikëpamjeve politike autoritariste në shoqërinë bashkëkohore perëndimore, shtoi Instituti.
Publikuesi në fakt, kishte menduar që fillimisht të printonte vetëm 4 mijë kopje, por e rriti numrin për shkak të kërkesës. Printimi i gjashtë do të dalë nëpër librari në fund të janarit.
Punimi me dy volume ka dalë në listën e revistës “Der Spiegel” për librat më të shitur jo-fiction të vitit të kaluar, e për dy javë në prill ka qenë, madje, në krye të kësaj liste.
Instituti ka organizuar edhe një seri të suksesshme prezantimi dhe debatesh rreth “Mein Kampf” në të gjithë Gjermaninë dhe gjetkë në Europë. Kjo, thotë Instituti, ka lejuar të vlerësohet ndikimi i edicionit të librit që shoqërohet me shënime.
“Rezultoi se frika se një publikim i tillë do të promovonte ideologjinë e Hitlerit, apo më keq do ta bënte atë shoqërisht të pranueshëm dhe do t’u jepte neonazistëve një platformë të re për propagandë, ishte totalisht pa baza”, thotë Andreas Wirsching, drejtori i Institutit të Historisë së Mynihut.
“Përkundrazi, debati për pikëpamjen e Hitlerit për botën dhe qasja e tij ndaj propagandës kanë ofruar një mundësi për të parë shkaqet dhe pasojat e ideologjive totalitare, në një kohë kur pikëpamjet autoritariste dhe slloganet e krahut të djathtë po fitojnë terren”.
Instituti thotë se të dhënat e mbledhura nga libraritë rajonale për ata që kanë blerë librin tregojnë se ata priren të jenë klientë të interesuar në politikë dhe histori, sikundër edhe arsimtarë dhe jo reaksionarë apo radikalë të krahut të djathtë.
Pavarësisht të gjithave, Instituti thotë se po mban një politikë kufizuese për të drejtat ndërkombëtare. Për momentin, vetëm edicionet në anglisht dhe në frëngjisht janë të planifikuara, pavarësisht interesimit nga shumë vende.
Instituti publikoi versionin e pajisur me shënime të “Mein Kampf”, janarin e vitit të kaluar, menjëherë pasi përfundoi e drejta e autorit.
Bavarisë iu dha e drejta për librin në vitin 1945 pasi aleatët morën nën kontroll shtëpinë më të madhe botuese naziste pas mposhtjes së Gjermanisë.
Për 70 vjet me radhë, shteti refuzoi të lejonte traktatin malcues të ribotohej për shkak të respektimit të viktimave të nazistëve dhe parandalimit të nxitjes e urrejtjes.
Por, “Mein Kampf” që do të thotë “Lufta Ime” kaloi si pronë publike më 1 janar të vitit të kaluar dhe Instituti tha se kishte frikë se një botim i ri pa komente kritike do të dilte në treg.
Pjesërisht autobiografik, traktati parashtron ideologjinë e Hitlerit që formësoi bazat e nazizmit. Ai e shkroi atë në vitin 1924 kur ishte në burg në Bavari për tradhti pas dështimit të puçit Beer Hall.
Libri parashtrohet në dy ide që ai i zbatoi në praktikë si lider i Gjermanisë duke e çuar vendin në Luftën e Dytë Botërore: aneksimi i vendeve fqinje për të fituar lebensraum, apo “hapësirë jetike” për gjermanët; dhe urrejtjen e tij për hebrenjtë që solli Holokaustin.
Rreth 12.4 milionë kopje u publikuan në Gjermani; dhe nga viti 1936, shteti nazist jepte një kopje të librit për çiftet e sapomartuara si dhuratë dasme.
Përgatiti: Juli Prifti -/tesheshi.com/
