Është liruar nga detyra Drejtori i Sigurisë Publike në Policinë e Shtetit, Gjovalin Loka.
Loka e mbante këtë detyrë që prej 15 shkurtit të vitit 2018, ndërsa më herët ka mbajtur edhe disa pozicione të tjera drejtuese, i fundit drejtor i DVP Shkodër.
Nga shef i Komisariatit nr. 1 në Tiranë, z. Loka vijoi më pas në disa nga drejtoritë më të rëndësishme të vendit, si ajo e Lezhës, Shkodrës dhe Vlorës.
Pak ditë më parë ministri i Brendshëm Bledi Çuçi, por edhe kryeministri Edi Rama, paralajmëruan se do të ketë ndryshime në komisariate e drejtori të policisë, ku brenda kësaj jave do të prezantohen edhe drejtorët e rinj. Rama tha se procesi i ndryshimeve në strukturat e larta drejtuese do të bëhet më shpjet nga se ç’ishte planifikuar.
Besohet se kjo, por dhe situata e rënduar e rendit ditët e fundit të jenë shkak i kësaj lëvizje.
Nga ana tjetër, te Gjovalin Loka kishte mbërritur këto ditë dhe një letër-ankesë nga KMSH, e cila pretendonte se katër imamë po përgatisnin të merrnin forcërisht drejtimin e institucionit. /tesheshi.com/
