Arabia Saudite dhe Egjipti do të lidhen në të ardhmen e afërt me një urë, e cila do të ndërtohet mbi Detin e Kuq. Marrëveshja është arritur mes mbretit saudit Selman dhe presidentit egjiptian es-Sisi.
Mbreti i Arabisë Saudite gjendet për një vizitë pesëditore në Egjipt, e para që prej ngjitjes së tij në fron. Marrëveshja është arritur në ditën e dytë të kësaj vizite.
Mbreti e lajmëroi marrëveshjen për ndërtimin e urës mbi Detin e Kuq pas takimit me presidentin es-Sisi, e përpara se përfaqësuesit e të dy vendeve të nisnin nënshkrimin e një numri marrëveshjesh për investime.
“Kam rënë dakort me vëllain tim, Shkëlqesinë e tij, presidentin Abdulfettah es-Sisi, për të ndërtuar një urë që i lidh të dy vendet,” njoftoi mbreti saudit.
Për të shtuar më pas, “Ky hap historik për t’i lidhur dy kontinentet, Afrikën dhe Azinë, është një transformim cilësor që do ta çojë tregtinë midis dy kontinenteve në nivele të papara.”
Ura mbi Detin e Kuq do të mbajë emrin e mbretit Selman. /tesheshi.com/
