Pati një vijueshmëri të çuditshme Top Story i së hënës i Sokol Ballës në Top Channel. Opinionistët e ftuar, ata që tashmë janë të zakonshëm në studion e këtij emisioni, Mustafa Nano, Arian Vasjari, Skënder Minxhozi dhe i riu tashmë në këtë lëmi, Agron Gjekmarkaj, pothuajse nuk komentuan apo debatuan fare.
Gjithçka u konsumua në copëza dialogimesh në distancë me ca lidhje jashtë studios, siç ishte ajo me kreun e PD-së, Lulzim Basha, me Vasilika Hysin nga selia e PS-së, si dhe me një lektor universitar të panjohur deri më sot të cili u quajt analist në titra, ndonëse shfaqej për herë të parë në media dhe me një performancë komentuese teje të dobët. Ndërsa në studio, mes vetë të ftuarve nuk u konsumua asnjë lloj debati në 1 orë e 30 minuta emision.
E vetmja gjë që la gjurmë ishte një kërkesë që Nano i bëri Bashës për të qenë mysafir në çadër me praninë e tij, ku t’i jepej mundësia t’i thoshte ca gjëra ndryshe nga ato ç’thuhen zakonisht aty. Nuk dihet nëse do ndodhë realisht kjo, por nëse ndodh do të ishte një zhvillim mjaft interesant. Mustafa Nano njihet si një kritik emblematik i modelit politik Berisha, që sipas tij po është trashëguar e përfaqësohet dhe nga Basha.
Nga ana tjetër, terrene të tilla si është ai i çadrës ku konsumohet çdo orë një militantizëm tip partiak, nuk janë aq të iluminuara sa të pranohet të përçohen mesazhe kritike ndaj lidershipit opozitar. /tesheshi.com/
