Armenia njoftoi të martën se ka refuzuar të organizojë një stërvitje ushtarake nga aleanca e udhëhequr nga Rusia në vitin 2023, mes pakënaqësisë me Moskën për mbylljen e një rruge jetike të furnizimit në enklavën e Nagorno-Karabakut.
Informacioni vjen në një kohë kur Armenia po tregon shenja të shtuara të intolerancës ndaj aleatit të saj rus, të cilin e akuzon se nuk i përgjigjet “provokimeve” të Azerbajxhanit në lidhje me Karabakun, ku Moska, e cila aktualisht është e zhytur në një ofensivë në Ukrainë, ka dislokuar paqeruajtësit e saj.
“Armenia mendon se nuk është e përshtatshme të mbahet një stërvitje e CSTO këtë vit… Ajo stërvitje nuk do të zhvillohet,” tha kryeministri armen Nikol Pashinyan në një konferencë shtypi.
Siç tha Pashinyan, Jerevani ka njoftuar tashmë aleancën ushtarake të udhëhequr nga Moska, e cila mbledh disa ish-republika sovjetike.
Në veçanti, ai qortoi Organizatën për “mosdënimin e veprimeve të Azerbajxhanit” dhe Rusinë për mospërmbushjen e detyrës së saj “të garantojë sigurinë armene”.
“Armenia priste veprime speciale nga rusët dhe partnerët e tjerë në fushën e sigurisë. Megjithatë, Jerevanit iu tha se kufijtë e Armenisë dhe Azerbajxhanit nuk janë vendosur”, u ankua Pashinyan. /tesheshi.com/
