Ish-politikania socialiste Arta Dade ka shprehur keqardhje për braktisjen e politikës nga ana e Nanos, kohës së cilës ajo i përket, në moshën 53-vjeçare.
“Besoj se ishte një ikje shumë e hershme, sepse ishte 53 vjeç, dhe kishte ende për t’i dhënë vendit, përtej rezervave që unë mund të kem për të”, tha znj. Dade në një intervistë televizive.
Kujtojmë që Nano nuk ka bërë një tërheqje zyrtare nga politika, por pasi humbi zgjedhjet në vitin 2005, ai, pas një dorëheqjeje, u zhvendos në ambicien për president, pa mundur dot që të shijojë dhe të qënit në krye të shtetit.
Znj. Dade vlerësoi më shumë kohën e saj, pra Nanon, më tepër se të tanishmen në PS me kryetar Ramën.
“Partia Socialiste me Fatos Nanon kryetar krijoi një të majtë moderne. Brenda partisë debati edhe për çështjet më të nxehta ishte pa asnjë lloj doreze. PS-ja, deri në kohën që kam qenë pjesë ka qenë partia më moderne dhe më e demokratizuar brenda strukturave. Qe fryma e përgjithshme e Fatosit, madje edhe kur ishte në burg si i dënuar politik, por edhe kolegët e tjerë që e drejtuan partinë kishin një mendësi ndryshe nga të gjitha partitë”, tha ajo, sipas së cilës PS tashmë është kthyer në një parti me një frymë ku vendos kryetari.
Për të tillë rasje, Rama do i përgjigjej me sens krahasues se dhe te një ekip, siç fjala vjen në futboll, është trajneri ai që vendos. /tesheshi.com/
