Një murale jo e zakontë: me hi e baltë

Artisti brazilian i rrugës Mundano përdori hirin nga zjarret në pyje si dhe baltën nga përmbytjet në Brazil për muralin e tij të fundit, të gjitha me thirrjen për t’i dhënë fund shpyllëzimit.

Muralja u zbulua të mërkurën, më 23 tetor, në anën e një ndërtese 11-katëshe në qendër të qytetit më të madh të Amerikës Latine, duke iu shtuar koleksionit të madh të grafiteve të Sao Paulos.

Vepra, me përmasa 48 metra me 30 metra, përshkruan trungjet e një pylli të djegur dhe fytyrën e një gruaje indigjene që mban një tabelë në anglisht ku shkruhet: “Stop the Destruction”.

Murali u pikturua me bojëra të bëra nga hiri i zjarreve në Brazil, duke përfshirë Amazonën, ku zona të mëdha të pyjeve të shiut janë shkatërruar nga zjarret e fundit në thatësirën më të keqe të regjistruar.

Mundano i tha Reuters se ai përdori gjithashtu baltën nga përmbytjet masive në Brazilin jugor në fillim të këtij viti.

Gruaja e përshkruar në mural është udhëheqësja indigjene Alessandra Korap Munduruku, e cila udhëhoqi një fushatë të suksesshme kundër kompanive shumëkombëshe të minierave që eksploronin në tokat e Amazonës të fisit të saj, duke i dhënë asaj çmimin Goldman për Mbrojtjen e Mjedisit 2023.

Mundano tha se murali i tij është një protestë kundër kompanive që kanë shtyrë kufirin agrar në pyllin tropikal të Amazonës me plantacione të mëdha soje dhe blegtori, gjë që e ka bërë Brazilin një nga eksportuesit më të mëdhenj të ushqimit në botë.

Përveç hirit dhe baltës, Mundano përdori argjilën nga rezervat indigjene që luftuan për njohjen e të drejtave të tyre mbi tokën, shpesh në konflikt me fermerët. Muralja përmban gjithashtu bojë të bërë nga urucum, një frut tropikal i kuq i përdorur si bojë trupi nga fiset indigjene të Amazonës.

“Kjo mund të jetë murali më i madh i bërë ndonjëherë me pigmente natyrale,” tha Mundano. “Emrat që shkruajmë këtu janë emrat e miliarderëve që vazhdojnë të jetojnë në një model të bazuar në shkatërrimin e ekosistemit dhe kontribuojnë në krizën klimatike”, shtoi ai. /tesheshi.com/