Ish-kryetari i Bashkisë së New York dhe miliarderi amerikan Michael Bloomberg, 77 vjeç, ka njoftuar se po hyn në garë për t’u emëruar një kandidat presidencial nën siglën e Partisë Demokratike.
“Unë jam duke kandiduar për president për të mposhtur Donald Trump dhe për të rindërtuar Amerikën. Ne nuk mund të lejojmë katër vjet të tjera të veprimeve të pamatura dhe joetike të Presidentit Trump. Ai është një kërcënim ekzistencial për vendin tonë dhe vlerat tona. Nëse ai fiton një mandat tjetër, ne kurrë nuk mund të rimarrim veten nga dëmii tij”, ka shkruar ish-republikani në faqen e tij të internetit.
Bloomberg e bën me dije këtë hap dhjetë javë para fillimit të zgjedhjeve partiake për kandidatët presidencialë.
Investimi i tij masiv në përparësitë demokratike, siç janë ndryshimi i klimës dhe kontrolli i armëve, i mbështetur nga një pasuri e madhe personale, mund t’i jepnin atij një numër të madh votash.
Miliarderi tashmë ka ndarë 30 milion dollarë për reklama televizive në disa shtete.
Bloomberg ishte një përkrahës i Partisë Demokratike deri në vitin 2001, por më pas u bashkua me republikanët para zgjedhjeve për kryetar bashkie dhe u zgjodh si kandidati i tyre.
Ai u rizgjodh kryebashkiak i New York-ut në 2005.
Katër vjet pas kësaj, si kandidat i pavarur, mori mandatin e tij të tretë si njeriu i parë i New York-ut.
Në Partinë Demokratike, gjithsej nëntë kandidatë kanë tërhequr nominimet deri më tani, dhe 17 prej tyre vazhdojnë të bëjnë fushatë.
Zgjedhjet presidenciale të SHBA-së do të mbahen më 3 nëntor 2020. /tesheshi.com/
