Një mesazh për politikën nga gruaja në krye të Kushtetueses

Ajo që e dallon Gjykatën Kushtetuese nga gjykatat e niveleve të tjera në Shqipëri, është jo stoku i dosjeve, potencuar kjo nga kryetarja e Kushtetueses gjatë një raportimi mbi bilancin e punës së vitit 2023.

“Trupa gjyqësore e plotësuar ka trajtuar çështje të rëndësishme. Parimet që e kanë udhëhequr gjykatën janë paanshmëria, transparenca dhe eficenca. Duke u kujdesuar dhe angazhuar për të respektuar afatet procedurale dhe dhënies së argumentimeve të vendime, gjykata ka synuar cilësinë e vendimmarrjes. Shqyrtimi rezulton me kohëzgjatje afro 8 muaj, 452 kërkesa, 367 kërkesa të regjistruara në 2023 dhe 85 kërkesa të mbartura në 2022. Në vitin 2024 janë mbartur 93 çështje nga viti 2023.

Gjykatat Kushtetuese nuk ka stok çështjesh të prapambetura si asnjë gjykatë tjetër”, pohoi Hola Zaçaj, gruaja që drejton këtë instancë të lartë të drejtësisë shqiptare.

Ndërsa në një mesazh për politikën, ajo tha:

“Ajo që dua të theksoj është që nëse mund ta jap si mesazh për politikën është se zbatimi i vendimeve të Gjykatëës Kushtetuese është rruga e duhur, e nevojshme dhe e vetme. Nuk ka mënyrë tjetër sjellje nëse duam të jemi institucione të një shteti ligjor që udhëhiqet nga parimi i demokracisë.

Nuk ka mekanizma që mund të vihen në lëvizje në rast kur nuk zbatohet një vendim i Gjykatës Kushtetuese. Vendimi i GJK është ligj dhe për këtë shkak nuk ka mekanizma”, argumentoi znj. Zaçaj. /tesheshi.com/