Shkencëtarët janë mburrur se janë një hap më afër në përpjekjen e tyre për të transformuar helmin e merimangës në një kurë për mosfunksionimin erektil.
Merimanga endacake braziliane (Phoneutria nigriventer) është një nga më të rrezikshmet për njerëzit për shkak të fuqisë së helmit të saj, por një aspekt i saj ka shumë vite që shkakton kuriozitet të madh në qarqet shkencore.
Konkretisht, pickimi i kësaj merimange shkakton dhimbje dhe inflamacione të forta, humbje të kontrollit të muskujve dhe probleme me frymëmarrjen, rrezik për paralizë dhe mbytje të mundshme pa trajtim, por gjithashtu rezulton se meshkujt që pickohen mund të përjetojnë ereksione të padëshiruara që zgjasin me orë të tëra.
Kjo është arsyeja pse shkencëtarët tani po planifikojnë të nisin provat më të fundit klinike për të testuar nëse helmi mund të jetë vërtet një trajtim i ri për mosfunksionimin erektil.
Përkatësisht, pjesëmarrësit në hulumtim do të marrin një komponent të helmit që shkencëtarët besojnë se shkakton një efekt anësor të çuditshëm. E quajtur BZ371A, thuhet se një pjesë e helmit nxit rrjedhjen e gjakut nëpër trup. Në natyrë, kjo e bën pickimin e kësaj merimange më vdekjeprurëse, sepse helmi i saj përhapet më shpejt nëpër trup. Por nëse vetëm ajo pjesë e nevojshme mund të izolohet, mund t’u japë shpresë miliona burrave që vuajnë nga mosfunksionimi erektil.
Studiuesit në Universitetin Federal të Minas Gerais në Brazil kanë përfunduar tashmë një provë të sigurisë së fazës së parë të BZ371A tek burrat dhe gratë. Një test pilot i veçantë i kryer te burrat dhe gratë zbuloi se aplikimi lokal i një pjese të helmit rezultoi në një rritje të rrjedhjes së gjakut në zonën e aplikuar, duke e bërë shumë më të lehtë për burrat që të kenë një ereksion.
“Kjo është arsyeja pse fauna jonë duhet të ruhet – është një burim i pashtershëm i molekulave bioaktive dhe ne nuk dimë ende rreth një për qind të këtij potenciali,” tha profesoresha Maria Elena de Lima, një eksperte në biokimi në Universitetin Federal të Minas Gerais.
Studiuesit tani planifikojnë të kryejnë një provë të re për burrat që i janë nënshtruar heqjes kirurgjikale të prostatës për kancer. Këta pacientë shpesh vuajnë nga mosfunksionimi erektil. Megjithëse barnat për këtë problem tashmë ekzistojnë, më e famshmja është Viagra, jo të gjithë meshkujt mund t’i marrin ato.
Disfunksioni erektil është i zakonshëm tek meshkujt, veçanërisht ata mbi 40 vjeç. Ka shkaqe të ndryshme, por më të shpeshtat janë stresi, lodhja, konsumi i alkoolit apo efektet anësore të disa ilaçeve.
Shkencëtarët gjithashtu shpresojnë të shqyrtojnë në të ardhmen nëse BZ371A mund të përdoret për të ndihmuar gratë që vuajnë nga mosfunksionimi seksual. /tesheshi.com/
