Siç njoftojnë mjetet e informimit, Ministria e Brendshme ka përgatitur një ligj për sigurinë publike, e që shpejt do të paraqitet për shqyrtim në komisionet parlamentare.
Kamerat e sigurisë janë kryefjala e këtij ligji, që mund ta kthejnë Shqipërinë në një Big Brother gjigand. Biznese, autobusë, shkolla, kopshte, lokale, taksi, ndërtesa banimi, do të jenë të detyruara të instalojnë kamera sigurie.
Vëmendje e veçantë u kushtohet banesave, e posaçërisht atyre që kanë depozita uji, si dhe banorë të njohur për veprimtari të jashtëligjshme.
Sipas këtij ligji, bizneset me më shumë se 10 milionë lekë të ardhura në vit do të detyrohen të vënë kamera sigurie. Të detyruar për ta bërë këtë gjë do të jenë dhe administruesit e ambienteve të përbashkëta shoqërore, ku rreziku për incidente është i konsiderueshëm.
Filmimet e këtyre kamerave mund të posedohen nga policia sa herë që ajo ta shohë të arsyeshme, si dhe parashikohet edhe lidhje e drejtpërdrejtë e këtyre kamerave me rajonet policore. /tesheshi.com/
