Britaniku Lewis Hamilton ka dalë fitues në garën e zhvilluar në Austin të SHBA-ve, dhe zyrtarisht është shpallur kampion bote, një titull i fituar për herë të tretë në karrierën e tij.
Kushtet atmosferike, e posaçërisht shiu i rrëmbyeshëm, e bënë krejt të paparashikueshme garën në Austin, por Hamilton ia doli ta kalojë i pari finishin, duke lënë prapa shokun e skuadrës, gjermanin Nico Rosberg, dhe rivalin tjetër, Sebastian Vettel, që piloton një Ferrari.
Kur kanë mbetur edhe tri gara gjer në përfundimit të sezonit, Hamilton është zyrtarizuar si kampion bote. Edhe në garën e konstruktorëve kryeson Mercedes, me plot 574 pikë, ndërsa Ferrari ka 374 pikë. Në diskutim është vetëm vend i dytë në renditjen e pilotëve, për të cilin luftojnë dy gjermanët, Vettel dhe Rosberg. /tesheshi.com/
