Presidentja greke Katerina Sakellaropoulou tha se Athina ka një “rol udhëheqës” brenda Bashkimit Evropian në mbështetjen e vendeve të Ballkanit Perëndimor në rrugën e tyre drejt anëtarësimit në BE.
“Si anëtari i nëntë më i vjetër i Unionit të sotëm, Greqia luan një rol udhëheqës në mbështetjen e negociatave të anëtarësimit me Ballkanin Perëndimor, si dhe në përmirësimin e marrëdhënieve politike dhe ekonomike të të gjitha vendeve në Evropën Juglindore dhe Mesdheun Lindor,” tha ajo në hapjen e një takimi të forumit ekonomik në Delphi.
Forumi Ekonomik Delphi, i cili është versioni i Evropës Lindore i Forumit Ekonomik Botëror në Davos, po mbahet këtë javë në kërë qytet grek 160 kilometra larg Athinës.
Ndër temat është agresioni rus ndaj Ukrainës, situata politike në Evropën Juglindore, me theks në Bosnjë dhe dialogu ndërmjet Kosovës dhe Serbisë.
Nën presidencën greke të BE-së në vitin 2003, u miratua Deklarata e Selanikut, në të cilën për herë të parë thuhej se e ardhmja e Evropës Juglindore qëndron brenda BE-së.
“Varësia energjetike nuk siguron paqe”
Kanë kaluar 20 vjet që atëherë, por vetëm Kroacia u bashkua me BE në 2013.
Presidentja greke beson se pushtimi i Ukrainës nga Rusia duhet të përshpejtojë negociatat e pranimit me Serbinë, Bosnje, Malin e Zi, Maqedoninë e Veriut dhe Shqipërinë.
“BE është pjekur gjeopolitikisht për shkak të pushtimit rus. Ajo e kuptoi se varësia ekonomike dhe energjetike nga regjimet autoritare nuk siguron paqe”, tha Sakellaropoulou.
Greqia mbështet Ukrainën, e cila u pushtua nga Rusia 14 muaj më parë.
“Greqia, si pjesë organike e Evropës dhe e Perëndimit, nxitoi që në momentin e parë të mbrojë vlerat e së drejtës ndërkombëtare nga revizionizmi agresiv. Mbështetja e popullit ukrainas, e ardhmja e të cilit në një Evropë demokratike është paqja dhe prosperiteti, mbetet detyrim i Perëndimit”, tha presidentja greke.
Duke iu referuar përmirësimit të marrëdhënieve midis Greqisë dhe Turqisë pas tërmeteve shkatërruese të shkurtit dhe ndihmave të dërguara nga Greqia, ajo vuri në dukje se kjo “i afron dy vendet fqinje dhe krijon shpresë për një epokë të re, më të mirë në marrëdhëniet dypalëshe”. /tesheshi.com/
