Një burrë nga Massachusetts është akuzuar për sulm ndaj një punonjëse muslimane të një kompanie ajore në aeroportin ndërkombëtar “John F. Kennedy” të Nju Jorkut. Autori raportohet të ketë goditur dhe sharë gruan duke i thënë asaj se “presidenti Donald Trump do ta shpëtojë vendin nga gjithë ju”, njoftuan autoritetet.
Robin Rhodes nga Worchester, kishte ardhur nga Aruba dhe ishte në pritje të një fluturimi të mërkurën në mbrëmje, kur ai iu afrua punonjëses së kompanisë Delta Rabeeya Khan, e cila kishte veshur një hixhab, ndërkohë që ajo ishte ulur në zyrën e saj.
Zyra e Prokurorit të Qarkut Queens Richard A. Brown, tha se Rhodes u afrua tek dera dhe nisi një bisedë me karakter fetar, duke e pyetur gruan nëse ajo fal namazin. Më pas raportohet se Rhodes grushtoi derën, e cila goditi pjesën e pasme të karriges së Khan. Khan më pas pyeti Rhodes në lidhje me atë se çfarë i kishte bërë atij dhe Rhodes u përgjigj: “Ti nuk ke bërë asgjë!” Ai më pas e mallkoi atë dhe e goditi gruan në këmbë, tha Brown.
Kur një person tjetër u përpoq ta qetësojë atë, Brown tha se sulmuesi Rhodes u largua nga dera, ndërkohë që Khan vrapoi jashtë zyrës. Rhodes e ndoqi pas, u ul në gjunjë dhe filloi të përkulet në imitim të një muslimani duke u lutur, bërtiti duke sharë dhe ofenduar dhe tha: “Trump është këtu tani. Ai do të na shpëtojë nga të gjithë ju”, tha Brown.
Në kohën e arrestimit të tij, Rhodes raportohet t’i ketë thënë policisë: “Unë mendoj se jam duke shkuar në burg për shkelje të rendit publik. Unë nuk mund të them me siguri të plotë nëse personi ishte një burrë apo një grua, sepse e kishte shpinën e kthyer dhe kishte kokën e mbuluar”.
Rhodes u akuzua për sulm, kërcënim dhe ngacmime të natyrës së krimit të urrejtjes.
“Manifestimi dhe të vepruarit bazuar në ndjenjën e fanatizmit dhe urrejtjes për të cilin është akuzuar i pandehuri, nuk kanë vend në një shoqëri të civilizuar, veçanërisht në Queens County, qarkun kulturalisht më të larmishëm në vend,” tha Brown. “Krimet e urrejtjes nuk do të tolerohen këtu dhe kur ato të ndodhin, ata që janë përgjegjës do të sillen para drejtësisë.” /tesheshi.com/
